لە دەربەندیخان
دانیشتووانی سێ گوند لە گیرفانی خۆیان رێگای گوندەکانیان چاک کردەوە
964+
میلاد جەلال – گەرمیان
دانیشتوانی سێ گوند لە سنوری قەزای دەربەندیخان، لەسەر گیرفانی خۆیان رێگای گوندەکانیان نۆژەنکردەوە، کە بەھۆی بارانبارین و لافاو لەکەڵک کەوتبوون.
دانیشتووانی ھەر سێ گوندی سراو، کوێرەک و ناودێ سندوقێکی کۆکردنەوەی پارەیان ھەیە، بە داھاتی ئەو سندوقە ڕێگای گوندەکانیان نۆژەنکردەوە.
فەرمان عەبدولڕەحمان، دانیشتوی گوندی سراو بە 964ى وت،”بەھۆی باران و لافاوی ساڵانی رابردوو بەشێکی زۆری رێگای گوندەکانمان تێکچوبوو، چەند پردێکی سەر رێگاکە، بەھۆی پڕبوونەوەیان بە خۆڵ و خاشاک، گیرابوون و لەکاتی بارانباریندا ئاو دەھاتە سەر رێگاکە”.
“خەڵکی ھەرسی گوندەکە پێکەوە بڕیارماندا، پارەی ئەو سندوقەی مانگانە پارەی تێدەکەین، دابەشی بکەین و ھەرلایەکمان لە پشکی خۆمان رێگاکەمان نۆژەنکردەوە”، فەرمان عەبدولڕەحمان وای وت.
وتیشی، “بەھۆی کەمتەرخەمی لایەنی پەیوەندیدار و پشتگوێخستنی گوندەکان، ناچاربووین لەسەر گیرفانی خۆمان رێگاکە تێکەڵەڕێژ بکەین و ڕێکی بکەینەوە”.
ئاماژەی بەوەشکرد، بە حەفارە و گەڵابە رێگاکەیان چاک کردووە، ھێشتا پێویستی بە رێکخستنی زیاتر ھەیە، بەڵام بەھۆی تێچووی زۆرەوە تەنھا ئەو شوێنانەیان چاک کردووە کە زۆر تێکچوبوو.
زۆربەی دانیشتوانی گوندەکانی سراو، کوێرەک و ناودێ ئاژەڵدارن و ناوچەکەشیان بەهۆی سروشتە جوانەکەیەوە بووەتە ناوچەیەکی گەشتیاری و رۆژانی ھەینی و پشوو خەڵکی زۆر رووی تێدەکات.
پێداچوونەوە: شۆڕش قادری
ئەو رێگایانەی بۆ گوندەکانی دەربەندیخان دەچێت چاکسازیان تیا دەکرێت
رێگەی دەربەندیخان - سیارە نۆژەن و فراوان دەکرێتەوە
