دڵشاد بە ماتۆڕێكەوە لە بازاڕی كەلارە
ناتوانێت لەسەر قاچەكانی بڕوات و سەختییەكانی ژیانی لە كۆڵ كردووە
+964
میلاد جەلال – گەرمیان
دڵشاد نوری، کەسێکی خاوەن پێداویستی تایبەتە، لە بازاڕی کەلار بە ماتۆڕێکی سێ تایەوە رۆژانە کارت دەفرۆشێت.
ھەر لە منداڵیەوە بەھۆی ھەبوونی کێشەیەک لە بڕبڕەکانی پشتی نەشتەرگەری بۆکراوە و توانای رۆیشتنی لەدەستداوە.
دڵشاد ھاوسەرگیری کردووە و ئێستا 42 ساڵ تەمەنیەتی، ماوەی 15 ساڵە بەوجۆرە بژێوی ژیانی دابین دەکات و کارتی مۆبایل دەفرۆشێت، پێشتریش چەندین کاری دیکەی کردووە.
رۆژانە لە بەیانی تا ئێوارە دێتە ناو بازاڕی کەلار، بە ماتۆڕە سێ تایەکەیەوە دەوەستێت و کارت دەفرۆشێت.
جگە لەوەی دەیەوێت کارێک بکات، ناچاری دەستی ھیچ کەسێک نەبێت، لەگەڵ ئەوەشدا خەمی ژینگەیەتی و کیسەیەکی کردووە بە دەسکی ماتۆڕەکەیەوە و پاشماوەی ئەو کارتانەی دەیفرۆشێت، کۆی دەکاتەوە.
دڵشاد دەڵێت، ئەم کارەم ئەگەرچی قازانجێکی زۆری نییە، بەڵام دڵخۆشم کە پشتم بەخۆم بەستووە و کار دەکەم، موحتاجی دەستی کەس نابم.
پێداچوونەوە: ئەرسەلان عەبدوڵا
