لە حاڵەت دەرچووە
500 کەس توشى سکچوون و رشانەوە بوون
964+
بڕوا مەجید- شارەزوور
بەرپرسى بەشى فریاکەوتن لە نەخۆشخانەى شەهید رەئوف بەگ لە شارەزوور ئاشکرا دەکات، تائێستا 500 کەس تووشى سکچوون و رشانەوە بوون کە زۆربەیان منداڵن.
سامان سابیر، بەرپرسى بەشى فریاکەوتن لە نەخۆشخانەى شەهید رەئوف بەگ بە 964ـى وت،”لە درەنگانێکى شەوى رابردووەوە نزیکەى 800 کەس سەردانى نەخۆشخانەیان کردووە و 500 کەس تووشى سکچوون و رشانەوە بوون”.
وەک باسى دەکات، توشبوون بە سکچوون لە حاڵە دەرچووە و بە لێشاو نەخۆش روولە نەخۆشخانە دەکەن کە زۆربەیان منداڵن.
هەرچەندە حاڵەتەکان مەترسیدار نین، بەڵام بەپێى قسەى بەرپرسانى نەخۆشخانەکە بێت دانیشتوانى دوو بۆ سێ گەڕەکن بۆیە گومان دەکەن سەرچاوەى ئاوى خواردنەوە هۆکار بێت.
هەر لەسەر ئەو بابەتە، وەزارەتى تەندروستى راگەیەنراوێکى بڵاوکردەوە و دەڵێت، پزیشکى پسپۆڕ و پێداویستى فریاگوزاریمان رەوانەى شارەزوور کردووە و لێکۆڵینەوە لە هۆکارەکەى دەکەین.
پێداچوونەوە: وریا فەتاح
