هاتوچۆی سلێمانی و گەرمیان شۆفێران ئاگادار دەکەنەوە

964+

شۆڕش قادری

باران بارین بەردەوامە و هاتوچۆکردن لە رێگاکان پێویستی بە وریایی زیاترە، بۆیە هەردوو بەڕێوەبەرایەتی هاتوچۆی سلێمانی و گەرمیان کۆمەڵێک رێنماییان بڵاوکردووتەوە و داوا لە شۆفێران دەکەن زیاتر پابەندی رێنماییەکانی هاتوچۆ بن.

بەڕێوەبەرایەتی هاتوچۆی سلێمانی لە راگەیەنراوێکدا دەڵێت، “بە گرنگی دەزانین شۆفێرانی بەڕێز پابەندبن بەم خاڵانەی لای خوارەوە”:

1- پابەندبوونی تەواو بە هێماکانی هاتووچۆ بە تایبەت هێماکانی دیاریکردنی خێرایی لەسەر شەقام و ڕێگاکان.

2- پێویستە گرنگییەکی زیاتر بدرێت بە ماوەی سەلامەتی لەنێوان ئوتومبیلی خۆت و ئوتومبیلەکانی بەردەمت.

3- مافی پیادەکان بدە و هاوکارییان بکە لە پەڕینەوەی شەقامەکان.

4- پێش دەستکردن بە ڕۆشتن دڵنیابکەرەوە لە ( فڵچەکان، ئاو و ڕۆن، برێک، لایت، ،تایەکان )

5- پێویستە هەر یەک لەم پارچانە لە ئۆتۆمبێلەکەتدا هەبن ( ئاگرکوژێنەوە، سێگۆشەی فسفۆر، پێویستییەکانی فریاگوزاری سەرەتایی، جەگ، لایتی دەستی، تایەی سپێر کە پێویستە ئامادەبێت بۆ بەکارهێنان).

6- لەو شوێنانە دوور بکەوەرەوە کە کۆبوونەوەی ئاو یان لافاوی تیادا دروست دەبێت.

هاوکات بەڕێوەبەرایەتی هاتوچۆی گەرمیان رایگەیاندووە: ئەو شۆفێرانەی کە لە سنوری بناری بەمۆ و تەنگی سەرتەک هاتوچۆ دەکەن بەتایبەت شۆفێرانی بارهەڵگر، ئەگەر زۆر پێویست نەبوو هاتوچۆ مەکەن و ئۆتۆمبیل بەکار مەهێنن، چونکە ئەگەری زۆرە ڕێگای ناو تەنگی سەرتەک زیخەڵانێکی زۆر بڕژێتە سەر رێگاکە و بەهۆی هەورازو لێژی و پێچاوپێچی رێگاکەوە مەترسی کۆنتڕۆڵ لەدەستدانی ئۆتۆمبێل زیاتر دەبێت.

دەشڵێت، “پردی سەرەکی ئاسنینی تۆڤگە بەپێی کەشف و نوسراوی رێگاوبان بەکەڵکی هاتوچۆی بارهەڵگر نایەت و بەهۆی ئەم شەپۆلە بارانبارینەوە، پردی دەستکردی خۆڵی ناو شیوی تۆڤگە کە پێشتر بەکار دەهێنرا بۆ ئۆتۆمبێلی بارهەڵگر، لەئێستادا بەکارهێنانی سەلامەت نیە و هاتووچۆی پێدا مەکەن چونکە ساڵانی پێشوو داڕماوە و جێگەی مەترسییە”.

هاتوچۆی گەرمیان: بە پۆستەرەکانتان هێماکانی هاتوچۆ مەشارنەوە

سبەینێ سەردانی هاتوچۆی سلێمانی و سۆران مەکەن