"چوار ئەندازیار کاریان تیداکردووە"
ئایا دیزاینی بەرزەپردی کانی سپیکە سەقەتە؟
+964
کامیار کەمال- پێنجوێن
ئەمڕۆ فلای ئۆڤەر یاخود بەرزەپردی کانی سپیکە لە نزیک بازگەی سەیدسادق کرایەوە، بەڵام بە گوێرەی سۆراغێکی 964، بەشێکی زۆری هاوڵاتیان پێیان وایە، دیزاینی پردەکە سەقەتە و لەبەر ئەو هۆکارەش درەنگ کراوەتەوە.
دوای بڵاوبوونەوەی هەواڵی کردنەوەی پردەکەش، بەشێکی زۆری دیکەی هاوڵاتیان لە کۆمێنتی سۆشیال میدیاکان باسیان لەوەکردبوو کە دیزانی پردەکە سەقەتە و بۆ بارهەڵگر نابێت، بەڵام بەڕێوەبەری پڕۆژەکە رەتی دەکاتەوە.
لەو بارەیەوە، محەمەد ئەرستۆ ئەندازیار و بەڕێوەبەری پڕۆژەکە لە کۆمپانیای جێبەجێکار بە 964ی راگەیاند، بۆ هەر پڕۆژەیەک زیاتر لە چوار ئەندازیار پێکەوە دیزاین دەکەن و دواتریش بە واژۆی 15 ئەندازیاری تایبەت پڕۆژەکە قبوڵ دەکرێت و پاشان، دەنێردرێتە وەزارەتی ئاوەدانکردنەوە و لەوێش جارێکی دیکە قبوڵی دیزاینەکە دەکرێت و لە هیچ قۆناغێکیدا پڕۆژەکە رەت نەکراوەتەوە.
“دیزانی پڕۆژەکە زۆر گونجاو و بێ کێشەیە و هیچ سەقەتیەکی تێدا نییە و بە گوێرەی ناوچەی ئیشکردن ئەو دیزاینەی بۆ کراوە و وەزیری ئاوەدانکرنەوە و جێگری سەرۆکی حکومەتی هەرێم پڕۆژەکەیان بینیوە” محەمەد ئەرستۆ وای وت.
ئەوەشی خستەروو، جادەی خوار پردەکە دوو سایدە و ئەگەر بێت و دیزاینی دیکەیان هەڵبژاردایە، پایەکان دەکەوتە ناو جادەکان کە ئەوەش نابێت.
لەبارەی درەنگ کردنەوەی پردەکەوە، کە بەشێکی هاوڵاتیان پێیان وابوو بەهۆی دیزاینەکەیەوە رەت کراوەتەوە و ناکرێتەوە، محەمەد ئەرستۆ وتی، چەند هۆکارێک هەبوون بۆ دواکەوتنی کردنەوەی پردەکە کە نەبوونی بودجە بە هۆکاری یەکەم و بوونی هێڵی کارەبا لەسەر پڕۆژەکە، بوەتە هۆی دواکەوتنی کردنەوەی پڕۆژەکە بەڵام هیچ کات بەهۆی دیزاینەوە نەبووە.
باسی لەوەشکرد، ئەکرا پڕۆژەکە فراوانتر بکرێت، بەڵام بە چونە ناو زەوی خەڵک دەکرا و خاوەن زەوییەکانیش قبوڵیان نەبووە و یاخود دەبوو سەرقاڵی کاری دادگا و قەرەبووکردنەوە بونایە.
محەمەد ئەرستۆ باسی لەوەش کرد، جادەی پردەکە 9.20 مەتر پانە و ئەو پێچەشی تێی دەکەوێت 18 مەتر پانیەتی و کە بە ئاسانی بارهەڵگری گەورە کۆنتڕۆڵی دەکات و خێرایی دیاریکراویش تێیدا بە 50 کیلۆمەتر لە کاتژمێرێکدا دیاری کراوە.
وتیشی، پردەکە دوو چین کۆنکرێتی تێکراوە بۆ ئەوەی بەهێزبێت و خۆڕاگر بێت لەسەر هاتوچۆی بەردەوامی بارهەڵگر و لە چەند ساڵی ئایندەشدا گرفتی بۆ دروست نەبێت، چونکە ئاستەنگی هاتوچۆ دروست دەکات.
پانی پردەکە 10مەتر و درێژییەکەی 250 مەترە، شۆفێر 120 مەتر لەسەر جادەی قیر دەڕوات تا دەگات بە پردەکە، بچووکیی پردەکە و دیزاینی جیاوازترە لەو پردە ئۆڤەر فڵایانەی کە لە بەدیلی یوتێرن دروست دەکرێن.
دوێنێش ئالان وەیس سەرپەرشتیاری پرۆژەی پردی کانی سپیکە، لە ئاوەدانکردنەوە و رێگه‌وبانی سلێمانی بە 964ی وت، “پردەکە لە قۆناغی یەکەمدا یەک ملیار و 200 ملیۆن دیناری تێچووە، ئەو بڕەش لە کۆی ماوەی تێچووی پردی پرۆژەی پردی شانەدەر بووە”، بەڵام بەپێی دوا داتای ئاوەدانکردنەوە و رێگاوبانی سلێمانی کە بڵاوی کردووەتەوە، لە قۆناغی دووەمدا 100 ملیۆن دینار بۆ تەواوکردنی پڕۆژەکە زیاد کراوە.
پێداچوونەوە: هاوبەش
