"رێگاکە نزیکە لە تەواو بوون"
تا کۆتایی ئەم مانگە لادانی کاتی لە رێگای کەلار – دەربەندیخان نامێنێت
+964
میلاد جەلال – گەرمیان
ئەمڕۆ پێنج شەممە 5.9.2024 سەرپەرەشتیاری ئیدارەی گەرمیان کارەکانی ڕێگای کەلار – دەربەندیخانی بەسەرکردەوە، بڕیارە تا کۆتایی ئەمساڵ رێگاکە تەواو بکرێت.
چۆمان ئەحمەد، وتەبێژی ئیدارەی گەرمیان بە 964ى وت،”چەند لادانێکی کاتی لەسەر ڕێگای کەلار – دەربەندیخان ھەیە کە خۆڵن، ئاستەنگی و بێزاری بۆ شۆفێران دروستکردووە، تا کۆتایی ئەم مانگە ئەو لادانە کاتیانە نامێنن”.
“کاری باش لە رێگاکە کراوە، ئێستاش کارکردن تێیدا بەردەوامە، بڕیارە تا کۆتایی ساڵی 2024 سەرجەم کارەکانی رێگای کەلار- دەربەندیخان، تەواو بکرێت و بخرێتە خزمەت ھاوڵاتیانەوە”،چۆمان ئەحمەد وای وت.
ئاماژەی بەوەشکرد،”لە ماوەی چوار مانگی رابردوو نزیکەی 20 ملیار دینار بۆ رێگاکە خەرجکراوە، 85%ی رێگاکە تەواو کراوە”.
لە ساڵی 2012ەوە، بڕیاری بە دوو سایدکردنی ڕێگای کەلار – دەربەندیخان دراوە، درێژی رێگاکە بە ھەردوو ئاراستەکەوە نزیکەی 80 کیلۆمەترە، 67 کیلۆمەتری رێگاکە قیرتاو کراوە.
پێداچوونەوە: توانا نەقی
