مریشکفرۆشێکى هەڵەبجە رووبەڕووى رێکارى یاسایى دەکرێتەوە

964+

وریا فەتاح

شەوى رابردوو کەسێک لیژنە قایمقامیەتى هەڵەبجە ئاگادار دەکاتەوە کە مریشکى خراپبوو لە دوکانێکدان و دەفرۆشرێن، سەرۆکى لیژنەکەش لەگەڵ تیمێک بەیانى ئەمڕۆ دەچێت پشکنینیان بۆ بکات و دەردەکەوێت بەشێکى زۆرى مریشکى نەخۆش و بن قاعە و ئیفلیجن.

فەلاح نامیق، سەرۆکی لیژنەکانی قایمقامیەت بە 964ـى راگەیاند: دواى ئەوەى لەسەر سکاڵاى هاوڵاتییەک سەردانى دوکانى مریشکفرۆشییەکەمان کرد و پشکنینمان بۆ مریشکەکان ئەنجام دا، دەرکەوت نەخۆش و ئیفلیج و بن قاعەى تێدایە.

مریشکى بن قاعە چییە؟

بە وتەى فەلاح نامیق، ئەو مریشکانەن کە گۆشتەکەیان هیچ سوودێکى تەندروستى نییە و میکرؤبەکان لە لەشیدا دەرنەچوون و مەترسى گواستنەوەی نەخۆشى لێدەکرێت.

“دوکانەکە 80 کیلۆ مریشکى هەبووە کە 37 کیلۆیان خراپ بووە و دەستى بەسەرداگیراوە”، سەرۆکى لیژنە هاوبەشەکانى قایمقامیەتى هەڵەبجە واى وت.

وەک ئەوەى فەلاح نامیق باسى دەکات، پێویستە هەر مریشکفرۆشێک ئەگەر بیەوێ مریشک سەرببڕێت، دەبێت کارتى تەندروستى دەربهێنێت، ئەگەریش مریشک سەرببڕیت و بیخاتە بەڕادەوە دیسان دەبێت مۆڵەتى تەندروستى هەبێت.