خانووە زیادەڕۆکان چییان بەسەردێ؟
دیزاینی خورماتوو بۆ 25 ساڵی داھاتوو دادەنرێت
+964
سیروان خورشید – دوزخورماتوو
خورماتوو دیزاینێکی نوێی بۆ داندراوە کە بۆ 25 ساڵی داهاتوو سوودی لێ وەردەگیرێت، هەوڵیش دەدەن خانووە زیادەڕۆکانیش بخرێنە سەر نەخشەی دیزاینە نوێیەکە.
ئەمڕۆ پێنجشەممە 15.8.2024 شاندێکی پارێزگای سەڵاحەدین گەیشتنە قەزای خورماتوو و لەگەڵ سەرجەم بەڕێوبەرە ئیدارییەکانی قەزاکە کۆبوونەوە.
یاسین محەمەد، ئەندامی ئەنجومەنی پارێزگای سەڵاحەدین بە964ـی وت، لەکۆبوونەوەکەدا سەرنج خرایە سەر دیزاینی شارەکە کە بۆ 25 ساڵی داھاتوو دانراوە و تا ئێستا لە کۆی ھەشت قۆناغ توانیویانە پێنج قۆناغ ببڕن.
وتیشی، “دانانی دیزاینی شار گرنگیی خۆی ھەیە، دەمانەوێت ئەو خانووانەی تاپۆ نین و زیادەڕۆن، بیانخەینە سەر نەخشە و دیزاینی شارەکە و بەمەش سوودێکی گەورە بە ھاوڵاتیانی خورماتوو دەگەیەنێت”.
پێداچوونەوە: ژێوار خدر
