نزیکەی 24 کاتژمێرە گوندی قامیش دەسووتێت

964+
رێژوان مامە قادر – سلێمانی
لە کاتژمێر دووی دوانیوەڕۆی دوێنێوە ئاگر لە رەز و باخ و پووش و پاوانی قامیش بەربووە و تا ئێستاش بەردەوامە، دانیشتوانەکەی دەڵێن بەهۆی زۆریی ئاگرەکەوە وازیان لێهێناوە و بەوان کۆنتڕۆڵ ناکرێت.
دوێنێ ئاگرەکە تەنیا لە باسکی زریزە بوو لە شاخی گوندەکە، بەڵام ئێستا کانی خاڵە وسوو، قوڵەتاڵوو، رێیەسوور، هەینەبەگ و بایلۆسە کە ناوی جیاوازی باسکەکانی شاخی گوندەکەن سووتاون.
ساڵح مەحمود، دانیشتووی گوندەکە بە 964ی راگەیاند، دوێنێ لای ئێوارە ئاگرەکە کۆنتڕۆڵ کرا، بەڵام شەو سەریهەڵدایەوە و رووبەرێکی زۆرتری سووتاندووە و خەڵکەکەش وازیان لێهێناوە چونکە بۆیان کۆنتڕۆڵ ناکرێت.
وتیشی، “هەرچی رەز و باخ و دارەبەن و ترش و چوالە بەو شاخەوە بووە هەمووی سوتاوە و زەرەر و زیانێکی زۆر بەر دانیشتوانەکەی کەوتووە”.
لای خۆیەوە کامەران حەسەن، قایمقامی قەزای ماوەت بە 964ی راگەیاند، ئاگاداری ئاگرەکەی گوندی قامیشن و لەگەڵ تیمەکانی بەرگری شارستانی لەسەر خەتن تا بچنە گوندەکە و هاوکاری دانیشتوانەکەی بکەن بۆ کوژاندنەوەی ئاگرەکە.
قامیش یەکێکە لە گوندەکانی شارباژێڕ و سەر بە قەزای ماوەتە، نزیکە 40 ماڵ دانیشتوانەکەیەتی و زیاتر پشت بە ئاژەڵدارى و باخدارى دەبەستن بۆ بژێوى ژیانیان.