گۆڕینی كیسەی نایلۆنی سەموونخانەكان بۆ كاغەز چی بەسەرهات؟

964+
ئەرسەلان عەبدوڵا

هەوڵ و تەنانەت بڕیارێكیش بۆ گۆڕینی كیسەی نایلۆنی سەموونخانە و نانەواخانەكانی كوردستان هەبوو، بەڵام سەرەڕای هەڵمەتێكی فراوان و رژدیی لایەنە بەرپرسەكان بۆ كارەكە، دواجار كارەكە سەرینەگرت و ئێستاش نانەواخانە و سەمونخانەكان هەر نایلۆن بەكار دەهێنن، كە بە قسەی چالاكوانێكی ژینگەیی مەترسییەكی زۆری بۆ سەر تەندروستی هاوڵاتییان هەیە.
دوو ساڵ لەمەوبەر بە مەبەستی پاراستنی تەندروستی و ژینگەپارێزی و كەمكردنەوەی بەكارهێنانی نایلۆن و پلاستیك، لە لایەن دوو رێكخراوی ناوخۆیی و جیهانی هەڵمەتی دابەشكردنی زەرفی كاغەز بەسەر نانەواخانە و سەموونخانەكانی هەولێر بەڕێوەچوو، هەروەها لە سلێمانی لە لایەن قایمقامییەتەوە بڕیاردرا زەرفی كاغەز لە بری نایلۆن بەكاربهێنرێت، بەڵام كارەكە سەرینەگرت.

قایمقامی هەولێر: لای ئێمە بڕیار نەبوو
نەبەز عەبدولحەمید قایمقامی ناوەندی هەولێر بە 964ی وت، لە هەولێر ئەم كارە نەبووە بڕیار و تەنیا هەڵمەتی بۆ كرا، چونكە هۆكار زۆر بوون بۆ جێبەجێنەكردنی.
وتیشی، “دڵنیانەبووین زەرفەكانیش تەندروست بن، جگە لەوە خەرجیی زۆر لەسەر فڕنەكان دەكەوت، ئێمە نەمانتوانیوە غاز و ئارد بە نرخی گونجاو بۆ ئەوان دابین بكەین، بۆیە نەكرا بابەتی زەرفی كاغەز بسەپێنین، جگە لەوە خەڵكیش بەپیر ئەو كارەوە نەهاتن”.

قایمقامیەتی سلێمانی قسە ناكەن
لە سلێمانی هەوڵێكی زۆر درا بۆ گۆڕینی كیسەی نایلۆن بۆ كاغەز لە نانەواخانە و سەموونخانەكان، تەنانەت بڕیاری بۆ دەرچوو.
964 ئەمڕۆ یەكشەممە 14.7.2024 پەیوەندی بە قایماقیەتیی سلێمانییەوە كرد، بەڵام ئەوان ئامادەنەبوون هیچ قسەیەك لەمبارەیەوە بكەن.

پلاستیك زۆر بەكاردێت و شێرپەنجە زۆر بووە
رۆژگار موحسین چالاكوان و سەرۆكی رێكحراوی رۆژگاری كورد بە 964ی وت، لە ساڵی 2022ـەوە كاریان لەسەر ئەو بیرۆكەیە كردووە و چەند هەڵمەتێكیان بە هاوكاری رێكخراوە بیانییەكان ئەنجام دا و زەرفی كاغەزیان بەسەر نانەواخانە و سەموونخانەكان دابەش كرد، بەڵام كارەكە نەگەیشتە ئەنجام.
رۆژگار وتی، “كارگەیەكی تایبەتمەند نییە ئەو زەرفە كاغەزانە دروست بكات، فڕن و سەموونخانەكانیش دەڵێن گران لەسەریان دەوەستێت و دەبێت سەموون و نان گران بكەن بەرامبەر پارەی زەرفەكان، ئەمەش خەڵك قبوڵی ناكەن”.
هەروەها دەڵێت، نەك هەر نایلۆنی سەموون و نان، ئێستا هەندێك لە ژنان لە ماڵەوەش پەرداخ و قاپ و پێداویستی سەفەری بەكاردەهێنن، كە پلاستیكن و ئەمەش زۆر مەترسیدارە، لە كاتێكدا لە ماڵەوە پێویست ناكات بەكاری بهێنن، چونكە مەترسیدارە و هۆكارێكی گەورەیە بۆ نەخۆشییەكانی شێرپەنجە.
رۆژگار دەڵێت: قسەمان لەگەڵ وەزارەتەكانی تەندروستی و رۆشنبیری كردووە، ئەوان و میدیاكانیش بەرامبەر بابەتی ژینگە هاوكار نین و فەرامۆشیان كردووە.

لێكۆڵێنه‌وه‌ ته‌ندروستییه‌كان ئاماژه‌ به‌وه‌ ده‌كه‌ن، نایلۆن ماددەیەكی تێدایە بە زوویی لەگەڵ ئەو گەرمییەی كە لە سەموون و نانی تازەدا هەیە، كارلێك دەكات و زیانی تەندروستی لێدەكەوێتەوە.
به‌ پێی ئاماری رێكخراوه‌كانی ژینگه‌پارێزی له‌ جیهاندا، ساڵانە 300 ملیۆن تۆن پلاستیك له‌ جیهاندا بەرهەم دەهێندرێت.

زه‌رفی كاغه‌ز به‌سه‌ر نانه‌واخانه‌ و سه‌موونخانه‌كان دابه‌ش ده‌كرێت