دیمەنی پاشماوەی سووتانی دوکانی زێڕنگەران لە بازاڕی قەیسەری هەولێر _ وێنە: 964
بابەتی سووتانی بازاڕەكانی كوردستان
هێزەكانی 70: چاوەڕێی لێكۆڵینەوەی هێزە ئەمنییەكانی عێراقین
964+
ئەرسەلان عەبدوڵا
هێزەكانی یەكەی 70ی پێشمەرگەی كوردستان روونكردنەوەیەكیان بڵاوكردووەتەوە و ئاماژە بەوە دەكەن، ئەوەی لە كۆنگرەی رۆژنامەوانی وتەبێژی وەزارەتی ناوخۆی عێراق و نوێنەری وەزارەتی ناوخۆی حکومەتی هەرێمی كوردستان لە بەغدا سەبارەت بە دەستگیركردنی ئەو كەسانەی بازاڕەكانی كوردستانیان سووتاندووە، هیچ پەیوەندییەكی بەوانەوە نییە و چاوەڕێی لێكۆڵینەوەی هێزە ئەمنییەكانی عێراق دەكەن.
هێزەكە لە روونكردنەوەیەكدا ئەمڕۆ دووشەممە 1.7.2024 دەڵێن. “بۆ رای گشتی رووندەکەینەوە بە هیچ شێوەیەک، دوور و نزیک هێزەکانمان و هێزەکانی تری هەرێمی كوردستان پەیوەندییان بەو رووداوانەوە نییە، کە لە هەولێری خۆشەویست، دهۆکی دەلال و کەرکوکی قودسی کوردستان روویانداوە”.
هەروەها دەڵێن، “جێگەی نیگەرانی و سەرسووڕمانە كە تەنیا نوێنەری وەزارەتی ناوخۆی حکومەتی هەرێمی كوردستان لە كۆنگرە رۆژنامەوانییەكەی بەغدا بە مەرامی تایبەت و وەك تۆمەت ئاماژە بە ناوی هێزەكانمان و سنووری سلێمانی دەكات، بەڕێز وتەبێژی وەزارەتی ناوخۆی عێراق بە روونی ئاماژەی بە زانیارییەكاندا بەبێ ئەوەی ناوی هیچ هێزێك بهێنێت”.
“لێرەوە رایدەگەیەنین کە نوێنەری وەزارەتی ناوخۆی حکومەتی هەرێم لەکۆنگرە رۆژنامەوانییەکەی بەغدا وتی: ئەو تۆمەتبارانە لەبەرامبەر بڕە پارەیەکدا “تەجنید” کراون. ئەمەش دەرخەری ئەوەیە و جەختیش دەکەینەوە کە؛ ئەم کەسانە نە لە ژێر فەرمان و چەتری ئێمە و هیچ هێزێکی ترمان ئەو کارەیان کردووە و نە پەیوەندیی بەهێزەکانمانەوە هەبووە”، لە راگەیاندراوەكەی هێزەكانی 70دا واهاتووە.
هەروەها ئاماژە بەوە دەكەن، “چاوەڕێی رێڕەوی تەواوی لێکۆڵینەوەی هێزە ئەمنییەکانی عێراق دەكەین، تا راست و دروستی دوور لە مەرام و پیلانی ناڕەوا بۆ رای گشتیی وڵاتەکەمان ئاشکرا بکەن كە هەر كەس و لایەنێك لە پشت سووتاندنی بازاڕەكانەوەیە، رووبەڕووی دادگا بكرێنەوە و بە سزای یاسایی خۆیان بگەن”.
ئەمڕۆ لە بەغدا هەردوو وەزارەتى ناوخۆى عێراق و هەرێمی کوردستان، لە بارەى ئاشکراکردنى ئەو کەسانەى لە پشت سووتاندنى بازاڕەکانى هەولێر و دهۆک و کەرکوکەوە، کۆنگرەیەکى رۆژنامەوانیى هاوبەشیان ئەنجام دا و جەختکرایەوە کە بکەرانى ئەو ئاگرانە، گرووپێکى سەر بە پەکەکەن.
هەروەها نوێنەری وەزارەتی ناوخۆی هەرێمی كوردستان ئاماژەیان بەوە دا، یەكێك لەو كەسانەی دەستگیركراوە سەر بە هێزەكانی 70یە و یەكێكی دیكەشیان سەر بە دژەتیرۆری سلێمانییە.
گروپێکی نەتەوەپەرستی تورکی دەڵێن "ئێمە لەنگەی هەولێرمان سووتاند"
تۆمەتبارانى سووتاندنى بازاڕەکانى هەولێر دهۆک و کەرکوک ئاشکرا کران
