لە سۆشیال میدیاوە
وەزارەتی کشتوکاڵ: قەرزی 100 ملیۆن دیناری دەدەین بە جوتیاران
+964
هێرۆ مەولودی
وەزارەتی کشتوکاڵ بڕیاریداوە قەرزێکی 15 تاوەکو 100 ملیۆن دیناری بە جوتیاران بدات بۆ ئەنجامدانی پرۆژەکانیان.
بەپێی بڕیارەکە، سەرجەم جوتیارانی هەرێمی کوردستان دەتوانن لەو قەرزە سوودمەند ببن.
لەوبارەیەوە، هیوا عەلی، وتەبێژی وەزارەتی کشتوکاڵی هەرێمی کوردستان بە تۆڕی 964ی وت، ئەم پرۆژەیە قەرزی بچوکە بۆ ئەو جوتیارانەی خاوەن بیرۆکە و پرۆژەی کشتوکاڵین و جوتیارانی سەرجەم پاریزگاکانی کوردستان دەگرێتەوە.
ئەو وتەبێژە باسی لەوەشکرد، ئەم پرۆژەیە ئێستا کارایە و لە لایەن وەزارەتی کشتوکاڵی حکومەتی هەرێمی کوردستان و بە هاوکاری و رێککەوتن لەگەڵ بانکی قەرتاسی و بە بێ سوو، بە شێوازی پرکردنەوەی فۆرم بە جوتیاران دەدرێت.
وەزارەتی کشتوکاڵ پێنج ساڵی داناوە بۆ گەڕاندنەوەی قەرزەکە، کە لە لایەن لیژنەیەکەوە دەبێت و لە هەمان کاتدا چاودێری پرۆژەکانیش دەکەن.
تۆڕی 964 دەزانێت لە کۆی 500 جوتیار کە فۆرمەکەیان پڕکردووەتەوە، پرۆژەی 150یان پەسەندکراوە.