تیمەکانى هۆبەى چاکسازى کارەباى رزگارى لە سنوورى گەرمیان... وێنە: کارەباى گەرمیان
لە هاویندا پێیان دەدرێت
گەرمیان چاوى لە 20 مێگاواتەکەیە
964+
وریا فەتاح
ساڵانە لەگەڵ هاتنى وەرزى گەرما، بە لەبەرچاوگرتنى بەرزى پلەکانى گەرما لە گەرمیان، وەزارەتى کارەبا 20 مێگاوات بۆ کارەباى گەرمیان زیاد دەکات، بەڵام ئەمساڵ تائیستا وەزارەتەکە دەنگى نییە و رەزامەندى نەداوە.
ئالان ئەرکان، وتەبێژى کارەباى گەرمیان بە 964ـى وت،”نوسراومان کردووە و داواى 15 بۆ 20 مێگاواتمان کردووە کە بۆ وەرزى گەرما بدرێت بە گەرمیان، بەڵام تائێستا وەزارەتى کارەبا رەزامەندى نەداوە”.
بەشە کارەباى سنوورى ئیدارەى گەرمیان 4.7%ـى کارەباى نیشتمانى هەرێمى کوردستانە کە دەکاتە 120 مێگاوات، ئەو 15 بۆ 20 مێگاواتە کە لە هاویندا وەک تایبەتمەندى گەرمى گەرمیان پێیان دەدرێت، ساڵانە لە 1 بۆ 15ـى 6 ئەو بڕە بۆسەر کارەباى گەرمیان زیاد دەکرێت.
تەنیا گەرمیان ئەو تایبەتمەندییەى نییە، لە وەرزى زستانیشدا پێنجوێن و چەند ناوچەیەکى دیکەش دۆخى کەشوهەوا ساردەکەیان لەبەرچاو دەگیرێت و مێگاواتیان بۆ زیاد دەکرێت.
بە وتەى ئالان ئەرکان، زیاترکردنى ئەو بڕە لە مێگاوات تا 1ـى مانگى نۆیە و دواتر ئەو بڕە کارەبایە وەردەگیرێتەوە، بەڵام ئێستا کە گەرمیان پلەى گەرمى گەیشتووە بە 48 پلەى سیلیزى ئەو بڕە کارەبایەى داوایان کردووە بۆیان زیاد نەکراوە.
ئیدارەی گەرمیان زیاتر لە 82 هەزار و 500 هاوبەشی کارەبای هەیە
