هۆشداری لە حەبە سێ دەنکییەکە دەدرێت

پێشەوا محەمەد

پزیشکێک لە رێگای 964ـەوە هۆشداری لە زۆر بەکارهێنانی حەبی Azithromycin دەدات، کە بە حەبە سێ دەنکییەکە ناسراوە.

حەبەکە هی ئیلتیهاباتی میکرۆبییە و دژە بەکتریایە.

خاڵس ئەحمەد، پزیشک و وتەبێژی پێشووی وەزارەتی تەندروستی بە 964ـی راگەیاند، کێشەی حەبەکە ئەوەیە لە زۆربەکارهێناندا میکرۆبەکان بەرگریی بەرامبەر پەیدا دەکەن و ئیدی حەبەکە هیچ کارگەرییەکی نامێنێت.

وتیشی، “ئەو حەبە لە دەرمانخانە و کلینیک و لەناو سەیدەلییەی ناو کۆڵانەکانیش بە ئاسانی دەدرێت بە نەخۆش و ئەوەش کاریگەریی خراپی دروست کردووە لەسەر ئەوانەی وەریدەگرن”.

پزیشک و دەزگا تەندروستییەکانی هەرێم بەردەوام هۆشداری لە زۆر بەکارهێنانی دەرمانی دژە بەکتریاکان دەدەن.

“ئەگەر کەسێک ئەو حەبە سێ دەنکییە زۆر بەکاربهێنێت دوای ماوەیەک کە کاریگەریی نەما پێویستە دەرمانی قوورستر بخوات و ئەو کاتە کاریگەرییە لاوەکییەکانی دەرمانەکە زیاتر دەبێت”، خاڵس ئەحمەد وای وت.