"قۆناغى دووگیانبوون پڕ له سترێسه"
خانمه دووگیانه‌كانی سلێمانی بەکۆمەڵ وەرزش دەکەن
964+
دیلان محەمەد جەزا
نه‌خۆشخانه‌ى سمارت له سلێمانى، كۆڕسێكی بۆ خانمه دووگیانه‌كانى ئه‌و پارێزگایه رێكخستووه، بۆ ئه‌وه‌ى له‌م قۆناغه‌ى ژیانیاندا سترێس وەلابنێن و خۆیان و منداڵه‌كانیان ته‌ندروست بن.
نه‌خۆشخانه‌كه، ژماره‌یه‌ك خانمی دووگیانى لە پارکی ئازادی كۆكرده‌وه و ده‌ڵێ “به وه‌رزشكردن هانیان ده‌ده‌ین به سروشتی کۆرپەكه‌یان له دایك ببێت”.
به‌شداربوویه‌كی ئه‌م كۆڕسه كه یه‌كه‌مجاره دووگیان ده‌بێت به 964ـى وت، ترسی له‌بارچوونى منداڵ و تێكچوونى خۆراكى هه‌یه، بۆیه هاتووه بۆ ئه‌م كۆڕسه.
پەیام والی، سه‌رپه‌رشتیاری كۆڕسه‌كه و پسپۆری خۆپاراستن بە 964 وت، نزیکەی ساڵێکە ناوەندێک کراوەتەوە بۆ وەرزشکردنی خانمانی دووگیان، كه یارمه‌تیده‌ریان ده‌بێت ئەم قۆناغە به سه‌ركه‌وتوویی و ته‌ندروستى تێبپەڕێنن.
وتیشی “خانمی دووگیان رادەهێنرێت پشت بەخۆی ببەستێت و ئەرک نەخاتە سەر کەسانی دەوروبەری و ئاگادار دەکرێتەوە لەو بابەتانەی زیانی پێدەگەیەنن”.
ئەوەشی خستەڕوو، خانمان پێویستە لە 18مین هەفتەوە راهێنان بکەن، بۆ ئەوەی جەستەیەکی تەندروستیان هەبێت و بەرگەی گۆڕانکارییە هۆڕمۆنییەکان بگرن.
پێداچوونه‌وه: فه‌رهاد حه‌سه‌ن