دیمهنى یهكێك لهو تۆڕانهى ئهمڕۆ دهستى بهسهردا گیراوه... وێنه: راگهیاندنى پۆلیسی دارستان و ژینگه‌ى راپه‌ڕین
رۆژانه راوچییه‌ك ده‌ستگیركراوه
له راپه‌ڕین 11 راوچی دیكه ده‌ستگیركران
964+
فه‌رهاد حه‌سه‌ن
له سنوورى ئیداره‌ى راپه‌ڕین 11 راوچی دەستگیرکران، كه خه‌ریكی راوى ماسی بوون له‌كاتێكدا راوكردن به‌فه‌رمى قه‌ده‌غه كراوه.
ئه‌م چالاكییه له‌لایه‌ن مەفرەزەیەکی سەر بە بنکەی پۆلیسی دارستان و ژینگەی چوارقورنە له سنورەی گونده‌كانى سارد، قامیشە، سوروشەم و گردەمارە له‌لایه‌ك و گونده‌كانى کانی پورە و دەربەند، ئه‌نجامدراوه.
ده‌ست به‌سه‌ر دوو ماتۆڕسكیل و شه‌ش شه‌ده داو و سێ تۆڕى ماسی و هه‌ندێك كه‌لوپه‌لى جیاجیاشدا گیراوه.
شۆڕش کاکە، بەڕێوەبەری بەڕێوەبەرایەتی پۆلیسی دارستان و ژینگەی راپەڕین بە 964ـی وت، ئه‌م 11 راوچییه له‌چه‌ند شوێنێكی جیاواز و له كاتى جیاوازیشدا ده‌ستگیر كراون.
وتیشی “له‌به‌ربه‌یانى ئه‌مڕۆوه تاوه‌كو دواى نیوه‌ڕۆ، ئه‌م چالاكیانه ئه‌نجام دراون”.
بەپێى ئه‌و ئاماره‌ى كه به‌ڕێوه‌به‌رى دارستان و ژینگه‌ى راپه‌ڕین به 964ـى داوه له‌سه‌ره‌تاى بڕیارى قه‌ده‌غه‌ى راوه‌ماسی تاوه‌كو ئێستا، 26 راوچیی له سنووره‌كه‌یان ده‌ستگیركراون و ده‌ست به‌سه‌ر چه‌ندین كه‌لوپه‌لى راوكردنى ماسیدا گیراوه.
لە رۆژى 5.3.2024ـەوە، وەرزى قەدەغەى راوەماسى دەستی پێكردووه و هەموو جۆرەکانى راو تا رۆژى 16.6.2024 قه‌ده‌غه‌كراوه.
لە هەرێمى کوردستاندا، بەپێى یاساى ژمارە 8ـى ساڵى 2008، یاساى پاراستن و چاککردنى ژینگەى لە هەرێمى کوردستان- عێراق، مامەڵە لەگەڵ ئەو پرسەدا دەکرێت.
دەروازەى چوارەمى هەمان یاسا و لە ماددەى 31 و بەپێى بڕگەکانى یەک و دوو و سێ، راوکردنى ماسى و باڵندە لە وەرزى جوتبوون و زاوزێدا بە هەموو شێوەیەک قەدەغەیە.
هاوکات بە پێى ماددەى چل و دوو لە حکومە سزاییەکاندا هاتووە:
یەکەم: لەگەڵ سەرپێچینەکردنى هیچ سزایەکى توند کە لە دەقى یاساکانى دیکەدا هاتبێ، سەرپێچیکەر حکومەکانى ئەم یاسایە و سیستەم و رێنماییەکانى کە بەپێى ئەوە دەرکراون، بە بەندکردن سزا دەدرێن، بۆ ماوەى مانگێک کەمتر نەبێت یان پێبژاردنێک لە 150 هەزار کەمتر نەبێت و لە 200 ملیۆن دینار زیاتر نەبێت.
دووەم: لە هەر جارێکدا سەرپێچییەکە دووبارە بکرێتەوە، سزاکە دوو بەرامبەر دەکرێتەوە.
