لەرۆژی 8ی مارسدا
ژنانی دوزخورماتوو: پەراوێزخراوین و دەرفەتی یەکسان نییە
+964
سیروان خورشید – دوزخورماتوو
ژمارەیەک لە ژنانی دوزخورماتوو گردبوونەوە و دروشمی جۆراوجۆریان بەرزکردەوە، ئەوان لە رۆژی جیهانیی ژناندا داوای هەلی کار و بایەخدانی زیاتر بە تواناکانیان دەکەن.
بۆ یەکەمجار ژنانی هەر سێ نەتەوەی کورد، عەرەب و تورکمان لە قەزای دوزخورماتوو لە رۆژی جیهانیی ژنان لە8ی مارسدا، ئەمڕۆ هەینی گردبوونەوە و بە چەند دروشمێک یادی ئەو رۆژەیان بەرز راگرت.
ژنانی قەزاکە لە ژێر دروشمی ژنان نیوەی کۆمەڵگا نین، بەڵکو هەمو کۆمەڵگان، ئەمڕۆ لە پێش کولێژی پەروەردەی قەزاکە گردبوونەوە و داوا دەکەن کە چیتر ژنان بە چاوی کەم تەماشا نەکرێن، بەڵکو رێزی تایبەتیان لێ بگیرێت و کاروباریان هاوشێوەی پیاوان بێت.
دەشڵێن، تا ژن بەرەو پێشکەوتن لە هەموو بوارەکاندا هەنگاو نەنێت، نابێت باسی پێشکەوتن بکرێت.
ئاریان سابیر بەرپرسی یەکێتیی ژنان لە دوزخورماتوو بە 964ی وت، ئامانجیان لە گردبوونەوەکە پیشاندانی ئەو گیروگرفتانەیە کە رۆژانە رووبەڕووی ژنان دەبێتەوە، کە تا ئێستا لە رووی ئازادییەوە مافەکانیان پێشێلکراوە و پشتگوێ دەخرێن.
داواشی کرد ئەوانەی توندوتیژی بەرامبەر ژنان دەکەن، سزا بدرێن.
هاوکات لە گردبوونەوەکەدا ژنانی ناڕازی لە دوزخورماتوو بەیاننامەکیان خوێندەوە و کۆمەڵێک داواکارییان خستەڕوو.
پێداچوونەوە: ئەرسەلان عەبدوڵا
