بەڕێوەبەری پەروەردەی دەربەندیخان: داوامکردووە لە پۆستەکەم لاببرێم

964+

میلاد جەلال – گەرمیان

بەڕێوەبەری پەروەردەی دەربەندیخان، دوای 25 رۆژ لە وەرگرتنی مۆڵەت، دوێنێ یەکشەممە 25.2.2024 دەستی بە دەوام کردەوە و ئەمڕۆ دووشەممە داوایکرد کەسێکی دیکە لە پۆستی بەڕێوەبەری پەروەردەی قەزاکە دابنرێت.

ھاوار حەمید بەڕێوەبەری پەروەردەی دەربەندیخان نزیکەی 5 ساڵە لەو پۆستەدایە.

بەڕێوەبەرەکە ئەمڕۆ دووشەممە 26.2.2024، داوای لە وەزارەتی پەروەردە کردووە، کەسێکی دیکە لە شوێنەکەی دابنرێت دواتر ماڵئاوای لە فەرمانبەر مامۆستا و کارمەندانی پەروەردەکەی دەکات، ھاوار حەمید، بەڕێوەبەری پەروەردەی دەربەندیخان بە 964ى وت،”دەستم لەکار نەکێشاوەتەوە، 25 رۆژ مۆڵەتم وەرگرتبوو ئەوەش بەھۆی دۆخی تەندروستیمەوە بووە”.

“دوێنێ دوای تەواوبوونی مۆڵەتەکەم، ھاتمەوە دەوام و ئەمڕۆش داوامکرد کەسێکی تر بدۆزنەوە بۆ شوێنەکەم، من ناتوانم بەردەوامی بە کار و ئەرکەکانی پۆستەکە بدەم وەک بەڕێوەبەری پەوەردەی دەربەندیخان” هاوار حەمید وای وت.

ئەو بەڕێوەبەرە رەتیدەکاتەوە، داواکەی پەیوەندی بە دۆخی بایکۆت و فشاری رێکارە کارگێڕییەکانی خوێندن بێت، کە لەبەرامبەر مامۆستایان گیراوەتەبەر و ئەوەی وت، “ماوەیەکی زۆرە لە پۆستی بەڕێوەبەری پەروەردەی دەربەندیخان بەردەوامم و ماندوو بووم، داوامکردووە بمگوازنەوە بۆ پۆستێکی تر”.

پێداچوونەوە: ئەحمەد مستەفا

پەروەردەی دەربەندیخان داوای پسپۆڕی "پەروەردەی تایبەت" دەکات

پەروەردەی دەربەندیخان هۆشداریەکی توند دەداتە مامۆستا و فەرمانبەران