دۆلار نایەتە خوارەوە

964+

هێمن بەکر – هەولێر

سەرلەبەیانی ئەمڕۆ سێشەممەش نرخی دۆلار هەر بەرزە و نەهاتووەتە خوارەوە، 100 دۆلار بەرانبەرە بە سەرو 158 هەزار دینار.

ئێستا لە بازاڕەکانی هەولێر و سلێمانی ئەگەر دۆلار بفرۆشیت، ئەوا 100 دۆلار بەرانبەرە بە 158 هەزار و 360 دینار، بەڵام ئەگەر بیکڕیت، ئەوا بەرانبەرە بە 159 هەزار و 500 دینار.

ئەوە لەکاتێکدایە، بەر لە سەری ساڵی 2023، نرخی 100 دۆلار گەیشتبووە 159 هەزار دینار.

بانکی ناوەندیی عێراق کۆبووەتەوە و هەوڵیداوە رێکار بگرێتەبەر، یەکێک لەوانە فرۆشتنی دۆلارە لە فرۆکەخانەی بەغدا بە هەمان نرخی پێشوو کە 100 دۆلارە بە 145 هەزار دینار.

هەر لە ماوەی رابردوودا، هەریەک لە محەمەد شیاع سودانی، سەرۆک وەزیرانی عێراق و تەیف سامی، وەزیری دارایی عێراق باسیان لەوە کردبوو، کە نرخی دۆلار جێگیر دەبێت.

تەیف سامی وتبووی، نرخی 100 دۆلاریان بە 145 هەزار دینار داناوە لە پرۆژە بودجەی 2023ی عێراق.