هێزەکانی ئەمریکا لە عێراق. فۆتۆ: ئاژانسەکان
دوای کشانەوەی هێزەکانی هاوپەیمانان
وەزیری بەرگری عێراق: دەتوانین مەلەفى ئەمنى کۆنتڕۆڵ بکەین
964+
وریا فەتاح
عێراق ئامادەیە بۆ کشانەوەى هێزەکانى هاوپەیمانان و وەزیرى بەرگریش دەڵێت: دەتوانین مەلەفى ئەمنى کۆنتڕۆڵ بکەین.
سابت محەمەد، وەزیرى بەرگرى عێراق لە بەیاننامەیەکدا رایگەیاندووە، هێزە چەکدارەکانى عێراق ئامادەکارى تەواویان بۆ کشانەوەی هێزەکانی هاوپەیمانان و کۆنترۆڵکردنی تەواوی مەلەفی ئەمنی لەو وڵاتەدا کردووە.
بەپێى بەیاننامەکە، لیژنەی باڵای سەربازی عێراقی-ئەمریکی (HMC) دەستبە گفتوگۆکانی لەگەڵ وڵاتانی هاوپەیمانی نێودەوڵەتی دەکاتەوە، دوای دەرکردنی فەرمانی تایبەت بەم پرسە لەلایەن فەرماندەی گشتی هێزە چەکدارەکانەوە.
“کاتی کشانەوەی هێزەکانی هاوپەیمانان دیاری دەکرێت و پەیوەندی هاوکاری هاوبەش لە نێوان عێراق و ئەمریکا و وڵاتانی هاوپەیمانان لە بوارە جیاجیاکانی سیاسی، ئابوری، کولتووری، ئەمنی، و سەربازیدا بنیات دەنرێت، کە هاوتەریب بێت لەگەڵ دیدگای حکومەتی عێراق”، وەزیرى بەرگرى عێراق وادەڵێت.
بە وتەى سابت محەمەد، هێزە چەکدارەکانى عێراق ئامادەکارى تەواویان کردووە بۆ کشانەوەی هێزەکانی هاوپەیمانان و کۆنترۆڵکردنی تەواوی مەلەفی ئەمنی لە وڵاتدا، بەتایبەتی دوای ئەو ئەزموونەی لە ساڵانی رابردوودا بەدەستیان هێناوە لە مامەڵەکردنیان لەگەڵ رووبەڕووبونەوەى هەڕەشە ئەمنییەکان.
