لاشەی دوو بێچوە سەگی مردوو لەسەر گۆڕی وەلی دێوانە دۆزرانەوە

+964

ئەحمەد عەبدوڵا

لە دوێنێ شەوەوە وێنەیەکی گۆڕی وەلی دێوانەی شاعیر، کە دوو بێچوە سەگی مردووی لەسەرە، سۆشیاڵ میدیای تەنیوە، سەرەتا وێنەکە لەلایەن ئارام حاجی شاعیر و رۆژنامەنووسی ئەدەبییەوە بڵاوکرایەوە و دواتر چەندین چالاکوان و رۆژنامەنووس وێنەکەیان بڵاوکردەوە و ناڕەزاییان لەسەر ئەو کارە دەربڕی.

ئارام حاجی، شاعیر و رۆژنامەنووسی ئەدەبی بە 964ی راگەیاند، دوانیوەڕۆی 19ی مانگ ناسیاوێکی لە گۆڕستانی سەیدسادق ئەو دیمەنەی بینیوە و وێنەی گرتووە و بۆ ئەوی ناردووە، ناسیاوەکەی وتوویەتی بێچووە سەگەکان بۆگەن ببوون، هەر چۆن هەوڵیداوە کە لایان ببات، نەیتوانیوە چونکە ترسی هەبووە بە تەواوی بەسەر گۆڕەکەدا بتەقێت و بڵاوببێتەوە.

ئارام حاجی وتیشی، بڕوایان وایە، کە بە “دەستی ئەنقەست” لاشەی ئەو بێچووە سەگانە خراونەتە ئەوێ، چونکە گڵکۆی گۆڕەکەی نزیکەی نیو مەتر بەرزە و سەگەکان خۆیان ناچنە ئەوێ.

هەر دوێنێ وا بڵاوکرایەوە، دەزگای کەریمی عەلەکە بڕیاریداوە گۆڕی وەلی دێوانە نۆژەن بکاتەوە، 964 پەیوەندی بە شاخەوان سدیق، بەڕێوەبەرى دامەزراوەکە کرد و وتی، فڕێندانى لاشەى دوو بێچووە سەگ لەسەر گۆڕى شاعیرى ئەویندار و خۆشەویستى وەلى دێوانە لە گۆڕستانى شارۆچکەى سەیدسادق، کارێکی ناشیرین و ناخهەژێنە و پێدەچێت بە مەبەست لەسەر ئەو گۆڕە دانرابن”.

شاخەوان سدیق وتیشی، وەک وەڵامێک بۆ ئەو کارە گۆڕەکە نۆژەن دەکەنەوە و داواشی لە بەرپرسانى ئیدارى و رۆشنبیرى سەیدسادق کرد هاوکاریان بن.

وەلید کوڕی کوێخا محەمەد ناسراو بە وەلی دێوانە، شاعێرێکی ناسراوی کوردی سەدەی ھەژدەیەم بووە، هۆنراوەکانی زیاتر بە شێوەزاری هەورامانی بووە و پشتاوپشت لەسەر زار گواستراوەتەوە، زۆربەی شیعرەکانی بۆ خۆشەویستی و لێکدابڕانی “شەم” بووە.

وەلی دێوانە لەم پارچە شیعرەیدا وەسیەت دەکات کە گۆڕەکەی چۆن بێت:

یاران وەسیەتم ئەمە بێت لاتان
هەر چەن کەوتوومە دوورە وڵاتان

تەنیا گۆڕەکەم لە رێی خێڵان بێ
نزیک هەوارگەی جاف و گۆران بێ

کێلێکی بەرزیش بە قەت باڵای (شەم)
لە ژوور سەرم بێت، بێ زیاد و بێ کەم

چەند وێنەیەکی گۆڕەکەی وەلی دێوانە کە لە وێنەیەکیان یەکێک لە بێچووە سەگەکان دەرچووە: