یەکێک لە شاخەکانی هەرێمی کوردستان کە لە رابردوودا بۆردومان کراوە. وێنە: AFP
تەنیا لە 2023دا
بەهۆى بۆردوومان و ئۆپەراسیۆنەکانى تورکیاوە 11 هاوڵاتى مەدەنى کوژراون
964+
وریا فەتاح
تەنیا لە ساڵی 2023دا، 23 هاوڵاتی مەدەنی بەهۆی بۆردوومان و ئۆپەراسیۆنەکانی تورکیا لە خاکی هەرێمی کوردستاندا کوژراون یان بریندار بوون.
بەپێى داتاکانى تیمى کوردستانى رێکخراوى CPT ئەمریکى کە رێکخراوێکى تایبەتمەندن لە چاودێرى کردنى بۆردومانەکان، لە 2023 دا، 11 هاوڵاتى مەدەنى هەرێمی کوردستان بەهۆى هێرش و بۆردوومانەکانى تورکیاوە کوژراون.
کامەران مەلا عوسمان، ئەندامى تیمى کوردستانى CPT، قسەى بۆ 964 کردووە و دەڵێت: لەو ژمارە هاوڵاتییە حەوت هاوڵاتیان بەهۆى فڕۆکەى بێفڕۆکەوان و سێ هاوڵاتیش بەهۆى فرۆکەى جەنگى و هاوڵاتییەکیش بەهۆى تەقینەوەى مین، گیانیان لەدەستداوە.
لەبارەى بریندارەکانیشەوە، ئەندامەکەى ئەو رێکخراوە وتى،”لەو 12 بریندارە، 10 هاوڵاتى مەدەنى بەهۆى فڕۆکەى بێفڕۆکەوانى تورکیا و سێ هاوڵاتیش بەهۆى تەقینەوەى مینى تورکیاوە بریندار بوون”.
“زۆرترین کوژراو و بریندار لە سنورى دهۆکە”
لە پارێزگای دهۆک پێنج کوژراو و سێ بریندار، لە پارێزگای هەولێر یەک کوژراو و هەشت بریندار، هەروەها لە پارێزگای سلێمانی پێنج کوژراو و دوو بریندار بەهۆی ئۆپەراسیۆن و هێرشەکانی تورکیا بۆسەر خاکی هەرێم لە ساڵی 2023دا تۆمارکراون”، کامەران مەلا عوسمان، واى بە 964 وت.
