یەکەم رۆژی نمایشی بووە
فیلمی شین شار بە شار دەگەڕێت
964+
دیلان محەمەدجەزا – سلێمانی
لە سلێمانی فیلمێکی نوێی کوردی بەناوی “شین” نمایشکرا، دەرهێنەری فیلمەکەش دەڵێت دەمانەوێت لە شارەکانی دیکەش نمایشی بکەین و تێچووەکەشی نزیکەی 180 هەزار دۆلار بووە.
فیلمی شین لە دەرهێنانی محەمەد مستەفایە و گۆرانیبێژ هەڵوێست محەمەد رۆڵی سەرەکی تێدا دەبینێت، بەڵام جیاواز لە هەموو رۆڵەکانی دیکە ئەمجارەیان وەستای نانەوایە و لە نمایشەکەشدا بەهەمان ستایلەوە دەرکەوت و تایبەت بە 964 وتی، لەم جلانە باشتر و جوانترم دەستنەکەوت، چونکە ئەو کەسانەی بە پاکی و قوتی خۆیان پەیدا دەکەن شایەنی ئەوەن لەسەر فەرشی سور بن.
ئەم فیلمە شەش ئەکتەر رۆڵی سەرەکیان تێدا بینیووە، ژانەری درامیە و باس لە چیرۆکێکی کۆمەڵایەتی دەکات، محەمەد مستەفا دەرهێنەری فیلمەکە بە 964ی وت، ” تێچووەکەی بە نزیکەیی 180 هەزار دۆلار بووە و هێشتا خەرجی دیکەشمان ماوە، چیرۆکی فیلمەکە بە تەواوی لەگەڵ بینەری کوردی یەک دەگرێتەوە”.
هەڵوێست محەمەد، رووبار خالید، ئالا عەباس، شەماڵی عەبەڕەش، كارۆ سەوز و كەژان عەبدولوەهاب رۆڵی سەرەكی تێدا دەگێڕن.
