بە درێژایی پێنج کیلۆمەتر
سێ پڕۆژە بۆ دەروازەی حاجیاوا دروستدەکرێن
964+
پێشەوا محەمەد
لە دەروازەی حاجیاواوە بە درێژایی پێنج کیلۆمەتر بۆ ناو شارەکە سەوز دەکرێت و دوو خەزانی ئاویشی تێدا دروستدەکرێت.
دروستکردنی خەزانی ئاوەکان لە جێبەجێکردندایە و بڕیار وایە بە سێ قۆناغ تەواو بکرێت و پێشبینی دەکرێت تا مانگی چواری ساڵی داهاتوو بخایەنێت.
هیوا عەبدوڵا، ئەندازیار لە بەشی باخچەکانی شارەوانیی ناحیەی حاجیاوا بە 964ـی راگەیاند، پڕۆژەکە بریتییە لە دانانی سیستمی ئاودێریی زیرەک، رووناککردنەوە و دوو خەزانی ئاو و روواندنی دوو هەزار نەمام تێیدا.
وتیشی، “سەرجەم قۆناغەکان 204 ملیۆن دیناری بۆ تەرخان کراوە و قۆناغ قۆناغ کێشەی جێبەجێکردنی نییە و ئەنجام دەدرێت”.
لەناو سەنتەری ناحیەی حاجیاوا نزیکەی 26 باخچە و پارکێکی خێزانی هەیە و رێژەی سەوزایی تێیدا نزیکەی 9%ـیە.
“دابینکردنی بوودجەکەی لەسەر داهاتی 100%ـی فرۆشتنی زەوییە نایابەکانی ناحیەکەیە و بە چاندنی ئەو نەمامانەش رێژەی سەوزایی ناحیەکەمان زیاد دەکات”، ئەوەش قسەی هیوا عەبدوڵایە.
