لە فێستیڤاڵەکەی کەلار نزیکەی دوو ملیار دینار ئاڵوگۆڕی بازرگانی کراوە

964+

میلاد جەلال – گەرمیان

دوای شەش رۆژ، فێستیڤاڵی بازاڕ لە کەلار کۆتاییھات و نزیکەی دوو ملیار دینار ئاڵوگۆڕی بازرگانی تێدا کرا.

نزیکەی 180 ھەزار گەشتیار بەشداریان لە فێستیڤاڵەکە کردبوو، بەمەش ژمارەی بەشداربووان بەراورد بە ساڵی پار 80 ھەزار زیاتر بووە.

ئەمڕۆ پێنجشەممە 23.11.2023، ھێرش فەیزوڵا بەڕێوەبەری گشتی گەشتوگوزاری گەرمیان بە 964ى وت، “400 خاوەنکار لە شارە جیاوازەکانی ھەرێمی کوردستان و ناوچەکانی خوارووی عێراق و ئێرانیشەوە ھاتبوون، لە ماوەی شەش رۆژی فێستیڤاڵەکە نزیکەی دوو ملیار دینار ئاڵوگۆڕی بازرگانی کراوە”.

ئاماژەی بەوەشکرد، جوڵەیەکی بازرگانی زۆر باش لەو شەش رۆژەدا کەوتبووە سنورەکە، بۆ یەکەمجاریشە لەرێگەی نۆ کۆمپانیای گەشتیاری گروپی گەشتیاریان ھێنایە کەلار و لە ھۆتێلەکان مانەوە.

خاوەن کارەکان، لەم فێستیڤاڵەدا توانیویانە ھەلیکار بۆ نزیکەی دوو ھەزار و 100 کەس برەخسێنن، کە رێژەی 42%یان کچ بووە، ھێرش فەیزوڵا وای وت.

فێستیڤاڵی بازاڕ لە کەلار لە رێکەوتی 16.11.2023 دەستیپێکرد ماوەی شەش رۆژ بەردەوامبوو، بەھۆی گۆڕانی کەش و ھەوا رۆژانی دووشەممە و سێشەممە فێستیڤاڵەکە راگیرا و ئەمڕۆ کۆتایی ھات، خواردنی کوردەواری و کاری دەستی و بەرھەمی کۆمپانیاکانی ناوخۆ لە ڤیستیڤاڵەکە ھەبوون.

پێداچوونەوە: هاوبەش ئەبوبەکر

لە فێستیڤاڵی بازاڕی کەلار منداڵان بەرهەمی دەستی خۆیان دەفرۆشن