ئیتر پێویست ناکات بچنە رانیە
نەخۆشخانەیەکی تایبەت بە لەدایکبوون و منداڵان لە قەڵادزێ دەکرێتەوە
964+
محەمەد عەلی ـ قەڵادزێ
بینای کۆنی نەخۆشخانەی قەڵادزێ نۆژەن دەکرێتەوە و تایبەت دەکرێت بە نەخۆشخانەی لە دایکبوون و منداڵان.
نەخۆشخانەکە موڵکی وەزارەتی تەندروستییە و بەهۆی کۆنییەوە دەوامی تیادا نەدەکرا، پێویستی بە نۆژەنکردنەوە بوو.
تاها محەمەد لێپرسراوی راگەیاندن و پەیوەندیەکانی تەندروستی راپەڕین بە 964ـی وت، بەهۆی قەیرانی داراییەوە نەدەتوانرا بینای تازە دروست بکرێت، بۆیە دەرخستەیەکی تەواو بۆ ئەو نەخۆشخانەیە کراوە، بۆئەوەی بتوانن بەکەمترین خەرجی نەخۆشخانەیەکی تایبەت بەمنداڵان و لەدایکبوون بکرێتەوە لە قەڵادزێ.
وتیشی، بەشێکی تایبەت بە لەدایکبوون و منداڵان لە نەخۆشخانەی فێرکاری شەهیدانی قەڵادزێ هەیە، بەڵام بچووکە و لە ئاستی دانیشتووان و فراوانی سنوورەکە نییە.
964 دەزانێت، هەندێک لە نەخۆشەکان بۆ چارەسەر کردن دەبێت رێگەیەکی دووتر ببڕن و دەچنە نەخۆشخانەی رانیە، بە کردنەوەی ئەو نەخۆشخانەیەی ئەو گرفتەی قەزای پشدەر چارەسەر دەبێت.
تەها محەمەد ئاماژەی بەوەکرد، رۆژی 14.11.2023رەزامەندی وەزارەتی داراییان وەرگرتووە بەگوژمەی یەک ملیار و 607 ملیۆن و 343 هەزار دینار بۆ وەرگرتنی تەندەر لەگەڵ کۆمپانیاکان تاوەکو پرۆژەکە بکەوێتە بواری جێبەجێکردنەوە.
پێداچوونەوە: توانا نەقی
