بەستۆرە بە سیستمی ڤار خولی تۆپی پێ بەڕێوەدەبات
+964
ئەحمەد شەمزین
وەرزشوانانی بەستۆرە خولێکی تۆپی پێیان لەسەر ئاستی ناحیەکە ئەنجام دا و سیستمی ڤاریشیان بەکارهێنا.
خولەکە بەبۆنەی بەناحیەبوونی بەستۆرە رێکخرابوو، بۆیە بە ” پیرۆزە بەناحیەبوونی بەستۆرە” ش ناونرا و 52 تیپ تێیدا بەشداربوون.
ئەحمەد جەمال، رێکخەری خولەکە بە 964ی وت، خولەکە لە هیچی کەم نەبوو، سیستمی ڤار، پزیشک و پێداویستی پزیشکی لە گشت یارییەکان دابینکرا بوو.
بە قسەی ئەحمەد جەمال، یارییەکانی خولەکە لە یاریگەی شەش یاریزانی بەڕێوەچوون و سەرجەم گوندەکانی سنووری ناحیەی بەستۆرە، پیرمام، کۆڕێ، شاوێس و پیرزین بەشداربوون.
لە یاریی کۆتاییدا کۆڕێ و بەرانەتی یارییان کرد، کۆڕێ بە دوو گۆڵ بەرامبەر بە گۆڵێک سەرکەوت و نازناوەکەی بەدەست هێنا.
پێداچوونەوە: بەهرە محەمەدئەمین
