ئیلۆن مەسک 250 دۆلار داشکاندن بۆ بەکارهێنەرانی ئێکس دەکات
964+
عادل کانەبی
تۆڕی کۆمەڵایەتی ئێکس کە لە رابردوو بە تویتەر ناسرابوو، بڕی 250 دۆلار داشکاندن بۆ ئەو کۆمپانیایانە دەکات کە بە بڕی 1000 دۆلار رێکلام لە پلاتفۆڕمەکەدا دەکەن.
لە ماوەی رابردوو بە هۆی هەندێک بڕیاری تایبەتی ئیلۆن مەسک خاوەنی کۆمپانیای ئێکس، رێژەی بەکارهێنەرانی لە تۆڕی ئێکس کەمیکرد بەهۆی ئەوەی رێکار و یاسا تازەکان لەگەڵ بەرژەوەندی کۆمپانیاکان نەدەگونجا، چونکە رووبەڕووی تێچوویێکی زۆری کردبوون.
بۆ ئەو مەبەستە ئیلۆن مەسک، لە تویتێک رایگەیاند، ئێستا کۆمپانیاکان لە کاتی رێکلامکردن بەبڕی هەزار دۆلار بڕی 250 دۆلار داشکاندنیان بۆ دەکرێت. ئەمەش بەمەبەستی راکێشانی زیاتری کۆمپانیاکان بۆ ناو ئێکس.
گۆڕینی ناوی تویتەر بۆ ئێکس دوای ئەوە هات کە کۆمپانیای مێتا ئەپێکی نوێی بە ناوی سرێدز بۆ رکابەرایەتیکردنی تویتەر خستە بەردەست بەکارهێنەران، لە پێنج رۆژی دەستپێکیدا 100 ملیۆن بەکارهێنەری ئینستاگرام ناوی خۆیان تۆمارکرد و وەک رکابەرێک بۆ تویتەری ئەوکات و ئێکسی ئێستا سەیر دەکرا، چونکە ئەویش بە هەمان شێوەی تویتەر رێگە بە بەکارهێنەر دەدات نووسین بڵاوبکاتەوە.