دوورخستنەوەی چەند منداڵێک لە هەڵمەتەکەی شەوی رابردوو. فۆتۆ: بەڕێوەبەرایەتی گشتی چاودێری و گەشەپێدانی کۆمەڵایەتی سلێمانی
هەشت کوڕ و چوار کچن
12 منداڵ لە شەقامەکانی سلێمانی دوورخراونەتەوە
964+
ژووری هەواڵ
لە شاری سلێمانی، شەوی رابردوو 12 منداڵ لەسەر شەقام و لە شوێنی نەگونجاو دۆزراونەتەوە و گواستراونەتەوە بۆ خانەکانی چاودێریی منداڵان.
ئەمڕۆ هەینی 19.7.2024، بەڕێوەبەرایەتیی گشتیی چاودێری و گەشەپێدانی کۆمەڵایەتیی سلێمانی رایگەیاند، شەوی رابردوو تا کاتژمێر 12:00 لە ناوبازاڕ و سەهۆڵەکەی سلێمانی هەڵمەتێک بۆ چاودێریکردنی منداڵان و ئاگاداربوونیان بەڕێوەچوو، لەو هەڵمەتەدا 12 منداڵ لەو شوێنانە دوورخراونەتەوە و گواسترانەوە بۆ ماڵەکانی منداڵان.
بەشێک لە منداڵەکان لەسەر شەقام و بازاڕ کاریان کردووە و بەشێکی دیکەیان دەرۆزەیان کردووە، ئەوە قسەی هێمن محەمەد، وتەبێژی بەڕێوەبەرایەتییەکەیە بۆ 964.
بێستون جەبار بەڕێوەبەری گشتیی چاودێری و گەشەپێدانی کۆمەڵایەتیی سلێمانی رایگەیاند، “منداڵانی سەرشەقام و دەرۆزەکەرەکانیش، کە لە کاتێکی نەگونجاودا و بێ ئەوەی سەرپەرشتیارانیان لەگەڵ بێت لە درەنگانی شەو دەبینرێن، بۆیە بە ئەرکی خۆمانی دەزانین دووریان بخەینەوە و رەسدیان بکەین.”
هەشت لە منداڵەکان کە لەسەر شەقام دوورخراونەتەوە کوڕ بوون، چوار منداڵەکەی دیکە کچن.
