هاتوچۆ پەکى کەوت
شۆفێرانى بارهەڵگر رێگاى کەرکوک بەغدایان داخست
964+
سیروان خورشید – دوزخورماتوو
هەر لەسەر کێشەى 20 هەزارەکە ئەمجارە شۆفێرانى بارهەڵگر، رێگاى کەرکوک بۆ بەغدایان لە نزیک سلێمان بەگ داخست.
کێشەى 20 هەزارەکە ئەوەیە، بارهەڵگرەکان بە بیانوى گومرگ و سۆنار لێیان وەردەگیرێت.
فیراس بەیاتی، کە شۆفێرێکى بارهەڵگرە بە 964ـى وت،”هۆکاری خۆپێشاندانەکەیان بۆ ئەوە دەگەڕێتەوە کە لەبازگەکان 20 هەزار دیناریان لێ وەردەگیرێت لە بەرامبەر سنۆنار و گومرگ”.
ئەوان جگە لە 20 هەزارەکە کێشەى ئەوەیان هەیە، بازگەکان 24 کاتژمێرى نین و لە دواى 12ـى شەوەوە مامەڵەکانیان رایى ناکرێن و هەندێ جار شۆفێران تا بەیانى دەوەستن و رێگاى دوو کاتژمێریان لێ بووە بە هەشت کاتژمێر، ئەو شۆفێرە بەو شێوەیە روونى کردەوە.
جەختیش دەکەنەوە، تا چارەسەرى کێشەکانیان نەکەن، رێگاکە ناکەنەوە.
964 زانیویەتى، لە کاتى گەیشتنى پۆلیسى فیدڕاڵى و هێزە ئەمنییەکانى سنورەکە، گرژى و ئاڵۆزى لە نێوان شۆفێرانى بارهەڵگر و هێزە ئەمنییەکان دروست بووە.
ئەوەش لە کاتێکدایە، چەند لە دوێنێوە خۆپیشاندانى شۆفێرانى بارهەڵگر لە کەرکوک و هەولێر و سلێمانى دەستیپێکردووە.
پێداچوونەوە: وریا فەتاح
