لە کەلار مێروو و مێشوولە زیانبەخشەکان لەناودەبرێن

964+

پێشەوا محەمەد

بەڕێوەبەرایەتی خۆپاراستنی تەندروستی گەرمیان سێ رۆژە هەڵمەتی قەڵاچۆکردنی مێروو و مێشوولەی زیانبەخش و گوێزەرەوەی نەخۆشی دەستپێکردووە و دەڵێن، 14 رۆژ بەردەوام دەبن.

هەڵمەتەکە دوکانەکانی مریشکفرۆشی لە کەلار و چواردەوری، هەموو کۆڵانەکانی ناو شار و چواردەوری کەلار، کوشتارگەکانی کەلار و رزگاری، مەیدانی ئاژەڵانی رزگاری، بەشە ناوخۆییەکانی کچان و کوڕانی زانکۆی گەرمیان و بینای کۆلێژی پزیشکی زانکۆی گەرمیان و چەندان شوێنی دیکە دەگرێتەوە.

کامەران محەمەد، بەڕێوەبەری خۆپاراستنی تەندروستی گەرمیان بە 964ـی وت، “هەڵمەتەکەمان دوو جۆرە، بەیانیان بە دەرمانی شل و پەمپ دەکرێت و ماوەی 10 رۆژ بەردەوام دەبێت، ئێوارانیشمان هەیە لە رێگەی ئامێرێکەوە بە دوکەڵ ئەو مێرووە زیانبەخشانە لەناودەبرێن”.

وتیشی، “ئەو هەڵمەتە ساڵانە چەند جارێک هەیە و لە وەرزەکاندا ئەنجامی دەدەین، ئەمساڵ دەبوو مانگی نۆ ئەوە بکەین بەڵام لە تەندروستییەوە رەزامەندییەکەمان درەنگ بۆ هاتەوە”.

نەبوونی نەختینە لە بانک کێشە بۆ تەندروستی گەرمیان دروست دەکات