باخەوانەکانی گردەگۆزینە قەرەبوو رەتدەکەنەوە
964+
هونەر فارس – گەرمیان
ژمارەیەک لە باخەکانی گردەگۆزینە دەکرێن بە پڕۆژەی نیشتەجێبوون، بەڵام باخەوانەکان ناڕازین و رەتیدەکەنەوە، لەبەرامبەر چۆڵکردنی قەرەبوو لە کۆمپانیای جێبەجێکار وەربگرن.
لەو رووبەرەی کە یەکە نیشتەجێبووەکەی لێ دروستدەکرێت، 123 باخەوان، هەنار، هەنجیر، ترێ، هەرمێ و لیمۆ و چەند جۆرێكی دیکەی میوە بەرهەمدەهێنن، بەڵام، زەوی خاوەن باخەکان موڵکی وەزارەتی کشتوکاڵە و بەپێی گرێبەستێک پێیان دراوە، کە لەساڵی 2012-وە کۆتایی هاتووە.
ئەمرۆ شەممە 9.9.2023، یەحیا محەمەد نوێنەری باخەوانەکانی شارەدێی گردەگۆزینە بۆ 964 وتی، “چەند جارێک کۆمپانیاکە هاتووەتە لامان و داوای رێککەوتنی لەگەڵ کردووین، بەڵام ئێمە قەرەبوومان ناوێ و باخەکانمان چۆڵ ناکەین”.
نوێنەری باخەوانەکان وتیشی، “زیاتر لە 50 ساڵە ئەو زەوییانە، لە باب و باپیرانمانەوە بووە بە سەرچاوەی بژێوی بەشێکی زۆری دانیشتوانی گردەگۆزینە و سەوزە و میوەی تێیدا بەرهەمدەهێنرێت”.
بۆ بەدواداچوون لە بارەی داواکاری باخەوانەکان، 964 پەیوەندی بە کەمال عەلی سەرۆکی شارەوانی گردەگۆزینەوە کرد، بەڵام پەیوەندیەکەی بەردەست نەبوو.
شاره‌وانیی گرده‌گۆزینه: بۆ تاپۆی زه‌وییه‌كان هیچ وه‌ڵامێكمان نییه
شارەدێی گردەگۆزینەی سەر بە قەزای کەلار، لە دوو هەزار و 500 ماڵ پێکهاتووە، بەشی سەرەکی دانیشتوانەکەی بە باخداری و کشتوکاڵەوە خەریکن.
پێداچوونەوە: ئەحمەد مستەفا