وەزارەتی ئاوەدانکردنەوە بۆ هاوڵاتیان: بۆ پڕکردنەوەی فۆڕم پارە مەدەن بە کەس

964+

پێشەوا محەمەد

وەزارەتی ئاوەدانکردنەوە و نیشتەجێکردنی هەرێم هۆشداری دەداتە هاوڵاتیان، بۆ پڕکردنەوەی فۆڕمی یەکەی کەمدەرامەتان پارە نەدەنە هیچ دوکانێک.

بە پێی زانیارییەکانی وەزارەتەکە، کە بە 964 دراوە، هەندێ لەو دوکانانەی سەرقاڵی وێنەگرتن و کۆپیکردنی ناسنامەن بۆ پڕکردنەوەی فۆڕمی یەکەی کەمدەرامەتان بڕی 15 هەزار دینار لە هاوڵاتیان وەردەگرن.

وەزارەتی ئاوەدانکردنەوە تا 1.12.2023 فۆڕمی ئۆنلاینی دابەشکردنی نۆ هەزار و چوار یەکەی کارا کردووە.

مەریوان مەلا حەسەن، وتەبێژی وەزارەتی ئاوەدانکردنەوە و نیشتەجێکردن بە 964ـی راگەیاند، پڕکردنەوەی فۆڕمەکە ئاسانە و پێویستی بە کۆپی هیچ بەڵگەنامە و ناسنامەیەک نییە و پێویست ناکات بۆ پڕکردنەوەی پارە بدرێت بە کەسی دیکە.

زانیارییەکانی وەزارەتەکە دەریدەخەن، تا ئێستا زیاتر لە 12 هەزار کەس ئەو فۆڕمەیان بۆ وەرگرتنی یەکە پڕکردووەتەوە، کە بەبێ پێشەکی و بە قیستی 25 ساڵ بەسەر کەمدەرامەتاندا دابەش دەکرێن.