کۆڵبەرێکی کورد بریندار کرا

964+

پێشەوا محەمەد

کۆڵبەرێکی کوردی شاری بانە لە سنووری هەنگەژاڵ بریندار کرا و رێکخراوێک دەڵێت، “بە تەقەی راستەوخۆی هێزە ئەمنییەکانی ئێران بەرکەوتووە”.

رووداوەکە دوانیوەڕۆی ئەمڕۆ سێشەممە 27.6.2023 روویداوە.

کۆڵبەرەکە لە فیشەک بەر ران و سمتی کەوتووە و “برینەکەی سەختە”.

رێکخراوی مافی مرۆڤی هەنگاو، کە رێکخراوێکی تایبەتە بە چاودێریی رەوشی مافی مرۆڤ لە رۆژهەڵاتی کوردستان، کەمێک بەر لە ئێستا بڵاویکردووەتەوە، کۆڵبەرەکە ناوی شێرکۆیە و خەڵکی گوندی “حەوتاش”ـی شاری بانەیە.

نووسیویشیەتی، “ئەو کەسە بە تەقەی راستەوخۆی هێزە ئەمنییەکانی ئێران بریندار بووە و ئێستا لە نەخۆشخانەیەکی شاری بانە چارەسەر وەردەگرێت”.

بە پێی ئامارەکانی رێکخراوەکە، لە سێ مانگی سەرەتای ئەمساڵدا هەشت کۆڵبەر کوژراون و 36ـی دیکەش برینداربوون.