پارکی ئازادی بە هەشت قۆناغ نۆژەن دەکرێتەوە

964+

پێشەوا محەمەد

پارکی ئازادیی سلێمانی بە هەشت قۆناغ نۆژەن دەکرێتەوە و دوو ملیار دیناری بۆ دابین کراوە، بەڵام لە کاتی نۆژەنکردنەوەکەدا داناخرێت.

سیستمی ئاودێریی پارکەکە گرنگترین بەشی نۆژەنکردنەوەیەتی بە قسەی بەرپرسانی شارەوانی سلێمانی، دواتر هەندێ چاکسازی تری ناوی و چاندنی سەوزایی ترە تیایدا.

لە قۆناغەکانی تردا سێتە وەرزشییەکانی بۆ نوێ دەکرێتەوە، رێکخستنەوە بۆ تەواوی پارکەکە دەکرێت و ئەو دەریاچانەئ تیاشیدایە ژێرەکانیان کۆنکرێت دەکرێن.

قۆناغێکی تری نۆژەنکردنەوەش بۆیاخکردنە بۆ رێڕەو و ئەو شوێنانەی پێویستی پێیەتی.

بەهرۆز سالار، بەڕێوەبەری باخچەکانی سلێمانی بە 964ی راگەیاند، پارکی ئازادی لە کاتی کارکردندا داناخرێت و قۆناغ قۆناغ ئیشەکانی تێدا دەکرێت.

964 دەزانێت بڕی دوو ملیار دینار بۆ نۆژەنکردنەوەکە تەرخان کراوە، “بەڵام بەو پارەیە تەواو نابێت و لانیکەم پێویستمان بە دوو ملیار دیناری دیکە دەبێت”.