لە دهۆک چوار کەس لەسەر فرۆشتنی ئامێری قۆپیەکردن دەستگیرکران

964+

هاوبەش ئەبوبەکر

لە دهۆک چوار کەس ئامێری بلوتوزیان بە قوتابیانی قۆناغی 12ـی ئامادەیی فرۆشتووە بۆ ئەوەی بەکاریبهێنن بۆ قۆپیەکردن، لەسەر ئەمە ئاسایش هەر چواریانی دەستگیرکردووە.

ئەمڕۆ هەینی، وەزارەتی پەروەردە لە فەیسبووک رایگەیاند، لەسەر سکاڵای ئەوان، ئاسایشی دهۆک چوار کەسی دەستگیرکردووە کە کاریان فریودانی قوتابیان بوو لە رێگەی تۆڕەکۆمەڵایەتییەکان.

وەزارەتی پەروەردە دەشڵێت، “پرۆسەی بەدیهێنانی دادپەروەری بەردەوامدەبێت بۆ قوتابیان و هەموو رێکارێکی  یاسایی پێویست دەگرینەبەر بەرامبەر هەر کەسێک یاسا شکێنی بکات لە پرۆسەی تاقیکردنەوەکان”.

لە بەرواری 3.6.2023ـوە، تاقیکردنەوەکانی پۆلی 12ـی ئامادەیی لە هەرێمی کوردستان بۆ هەردوو بەشی زانستی و وێژەیی بە بەشداری زیاتر لە 117 هەزار قوتابی دەستیپیکردووە.

لەو کاتەوە دەیان کەس لەسەر فرۆشتنی ئامێرەکانی قۆپیەکردن دەستگیرکراون.