ئاستی ئاوی بەنداوی دهۆک دوو مەتر و نیو زیادی کردووە

964+

توانا نەقی

رێژەی باران بارینی ئەمساڵ بەنداوی دهۆکی بوژاندەوە و ئاستی ئاوی بەنداوەکە دوو مەتر و نیو زیادی کردووە.

ئەو رێژە زیاد کردنە بە قسەی بەڕێوەبەری بەنداوەکە لەچاو ساڵی پار و پێراردا ئەوەندە زیادی کردووە ئەگینا ساڵەکانی پێشوو باشتر بووە.

فەرهاد محەمەد، بەڕێوەبەری بەنداوی دهۆک بە 964ـی راگەیاند، ئاستی ئاوی بەنداوەکە بۆ ئەمساڵ دوو مەتر و نیو زیادی کردووە، ئەمە لە چاو ساڵەکانی 2021 – 2022 زۆر باشترە.

وتیشی، هێشتا نەگەشتووە بەو ئاستەی کە لەساڵی 2019 باشتر بێت کە لە وەرزی بارانباریندا بەنداوەکە رێژەیەکی زۆر ئاوی گلدایەوە.

ئێستا بەهۆی ئەو رێژە بارانەی باریووە و ئەو ئاوەی گلدراوەتەوە لە بەنداوی دهۆک مەترسی وشکە ساڵی نەماوە و رێژەی ئاوەکەش سوودێکی زۆری هەیە بۆ ئاودێری و کشتوکاڵ و چاندن، بەڕێوەبەری بەنداوی دهۆک وادەڵێت.

بەنداوەکە لە ئێستادا زیاتر لە 22 ملیۆن مەتر سێجا ئاوی تێدایە کە ئەو رێژەیە لە چاو ساڵی پاردا دوو ملیۆن مەتر سێجا ئاوی زیاترە.