هێڵکاری گەیشتە شەقامەکانی سۆران
964+
ئاسۆ وەرتی – سۆران
ئەمڕۆ سێشەمە 16.5.2023 لە ناو بازاڕی سۆران دەستکرا بە هێڵکاری شەقامەکانی شارەکە .
بۆیەکەم جار هاتوچۆی سۆران بە تیمێکی راهێنراو شەقامەکانی ئیدارەی سۆران هێڵکاری دەکات، بەتایبەت ئەو شەقامانەی تازە و نوێن هیچ هێڵکارییان تێدانیە.
موحسین تەحسین، بەرپرسی راگەیاندنی هاتوچۆی سۆران بە 964ی وت، “هێڵکاری شەقامەکان جگە لەوەی جوانکارییە، ئاسانکاریش بۆ شۆفێر دەکات چونکە مادەیەکی تێدایە وەک فسفۆر کە شەوانە وادەکات شۆفێر بە ئاسانی شەقامەکە ببینێت و له رێڕەوی خۆی دەرنەچێت.
وتیشی، لەکاتی رووداوەکانیش بە ئاسانی دەزانرێت کامه شوفێر کەمتەر خەمەو سەرپێچی کردووە.
هێڵکاری شەقامەکانی سۆران پێشتر لەلایەن کۆمپانیا ئەهلییەکەکانەوە ئەنجام دەدرا، لەسەر رەزامەندی وەزیری ناوخۆ کڕینی ئامێری تایبەت بەهێڵکاری دابین کرا و تیمێک لە بەڕێوەبەرایەتی هاتوچۆی سۆران نێردرانە شاری هەولێر بۆ راهێنان و شارەزابوونی ئامێرەکان.
پێداچوونەوە: توانا نەقی