“پەلاماردان و داگیرکردنی گوندەکان و دادگا و دادپەروەری عێراق دەخاتە بەردەم بەرپرسیارییەتی گەورە”

964+

فەرمان سادق

لەسەر شەڕەکەی نێوان دانیشتووانی گوندی پەلکانە و عەرەبە هاوردەکان، دەستەی ناوچە کوردستانییەکانی دەرەوەی ئیدارەی هەرێم دەڵێت: ئەوەی روودەدات دادگا و دادپەروەری عێراق دەخاتە بەردەم بەرپرسیاریەتییەکی گەورە، چارەسەریش جێبەجێکردنی مادەی 140ـی دەستوورە.

رووداوەکەی گوندی پەلکانە دوێنی، لە یەکەم رۆژی جەژنی رەمەزانەوە روویدا کاتێک پێنج شوانکارەی عەرەب رانە مەڕەکانیان بۆ لەوەڕاندن دەبەنە سەر زەوی جوتیارانی گوندی پەلکانە و بەهۆیەوە شەڕ لەنێوانیان روودەدات و 10 کەس لە هەردوولا بریندار دەبن.

لەسەر رووداوەکە، ئەمڕۆ هێزی پێشمەرگە جولێندراوە و چوونەتە گوندی پەلکانە و مۆڵەتی 24 کاتژمێریان بە عەرەبی هاوردە داوە کە گوندەکە چۆڵ بکەن.

تا ئامادەکردنی ئەو هەواڵە، بەگوێرەی زانیارییەکانی 964، پێنج ماڵی عەرەب گوندەکەیان چۆڵ کردووە.

لەسەر رووداوەکە، دەستەی گشتی ناوچە کوردستانییەکانی دەرەوەی ئیدارەی هەرێم لە راگەیەندراوێکدا کە کەمێک پێش ئێستا بڵاوی کردووەتەوە دەڵێت: لە یەکەم ڕۆژی جەژنی ڕەمەزاندا لەبری جەژنەپیرۆزە و گەردن ئازادی و دابەشکردنی شیرینی، عەرەبی هاوردە ئەکەونە وێزەی دانیشتووانی کوردی ناوچەکە و خۆشیی جەژن ئەگۆڕن بۆ پشێوی و هەڕەشە و چاوسوورکردنەوە و پەلاماردانی کوردی خاوەنزەوی و کێڵگەی ناوچەکە.

هاوکات ئاماژە بەوەش دەکات کە ئەم پەلاماردانە و داگیرکردنی گوندەکان و خاپوورکردنیان لە سایەی حکومەتەکانی دوای رووخانی سەدامیش بەردەوامە و رووئەدات، ئەمەش دادگا و دادپەروەری عێراق دەخاتە بەردەم بەرپرسیارییەتی گەورە، “ئێمە لەکاتێکدا ئیدانە و نیگەرانی قوڵی خۆمان رادەگەیەنین، چاوەڕێن لە کابینەکەی بەڕێز (محەمەد شیاع سوودانی) سنوورێک بۆ ئەم جۆرە دژایەتیانە دابنرێت و دووبارە و سەد بارە نەبنەوە وەک لەئێستادا بەدیدەکرێت.

راگەیەندراوی دەستەی ناوچە کوردستانییەکان لەبارەی رووداوەکانی گوندی پەلکانە:

بەداخەوە ئەمە چەندین جارە لە ناوچەی سەرگەڕان و بە دیاریکراوی لە سنووری گوندی پەلکانەی سەر بە پارێزگای کەرکوک، بەردەرگا لە دانیشتووانی کوردی ناوچەکە ئەگیرێت و لە یەکەم رۆژی جەژنی رەمەزاندا لەبری جەژنە پیرۆزە و گەردن ئازادی و دابەشکردنی شیرینی، عەرەبی هاوردە ئەکەونە وێزەی دانیشتووانی کوردی ناوچەکە و خۆشیی جەژن ئەگۆڕن بۆ پشێوی و هەڕەشە و چاوسوورکردنەوە و پەلاماردانی کوردی خاوەنزەوی و کێڵگەی ناوچەکە.

بەداخەوە ئەم پەلاماردانە و داگیرکردنی گوندەکان و خاپوورکردنیان لە سایەی حکومەتەکانی دوای رووخانی سەدامیش بەردەوامە و روودەدات، ئەمەش دادگا و دادپەروەری عێراق دەخاتە بەردەم بەرپرسیارییەتی گەورە، ئێمە لەکاتێکدا ئیدانە و نیگەرانیی قوڵی خۆمان رادەگەیەنین، چاوەڕێن لە کابینەکەی بەڕێز (محەمەد شیاع سوودانی) سنوورێک بۆ ئەم جۆرە دژایەتیانە دابنرێت و دووبارە و سەدبارە نەبنەوە وەک لە ئێستادا بەدی دەکرێت.

لەهەمانکاتدا، داوا دەکەین دەستوور و یاسا بەرکارە نوێیەکان ببنە بنەما بۆ چارەسەرکردنی کێشەکان، چونکە پەلامار و هەڕەشەی چەکداری، نە برینەکان ساڕێژ دەکات و نە هاوڵاتیانی کوردی ئەو ناوچانەش بەم کردەوانە بێدەنگ دەبن.

لەکۆتایشدا هەموو لایەک دڵنیا ئەکەین بە هەوڵی دڵسۆزان ئێستا بارودخی ناوچەکە ئارامە، بەڵام پێمانوایە ماددەی 140 بنەما گشتییەکەی چارەسەربوونی یەکجاری کێشەکانە، لەمبارەیەوە روودەکەینە بەڕێزان لە سەرۆکایەتی کۆمار و وەزیر و فراکسیۆنە کوردەکان لە بەغداد، توانا دەستوورییەکانی خۆیان لە ئاست جێبەجێکردنی ئەم ماددە دەستووریە بخەنەگەڕ، لەلایەکی تریش هەوڵەکانیان زیاتر بکەن بۆ نەهێشتنی ئەم یاسا شکێنی و زیادەڕەوییانە.