لە سنووری داقووق
لە یەک هەفتەدا شەش کەس بەهۆی هێرشی بەرازەوە برینداربوون
964+
سیروان خورشید – دوزخورماتوو
بەیانی ئەمڕۆ دووشەممە، دوو هاوڵاتی لە سنووری قەزای داقووق بەهۆی پەلاماری بەرازەوە برینداربوون و لەماوەی هەفتەیەکدا شەش کەس بەهۆی هێڕشی “رەوە بەرازەوە” رەوانەی نەخۆشخانە کراون.
محەمەد سەلمان، جێگری بەڕێوەبەری نەخۆشخانەی داقوق بە 964ـی وت، بەیانی ئەمڕۆ دوو هاوڵاتی بەبرینداری گەیەندرانە بەشی فریاکەوتنی نەخۆشخانەکەمان و دوای پشکنینی سەرەتایی دەرکەوت کە بەهۆی هێڕشی رەوەبەراز بۆ سەریان بریندار بوون.
لە ماوەی هەفتەیەکدا ئەمە شەشەم حاڵەتە کە بەهۆی هێڕشی رەوە بەرازەوە شەش هاوڵاتی بەبرینداری گەیەندراونەتە نەخۆشخانە و بەشێکیان چارەسەریان بۆ کراوە و بەشێکی دیکەیان لەژێر چاوێری پزیشکدان.
بە قسەی ئەو بەرپرسە، تەنیا یەکێک لە بریندارەکان بەهۆی سەختی برینەکەیەوە رەوانەی نەخۆشخانەی ئازادی کەرکوک کراوە.
هەروەک وتی، بریندارەکان شەش گەنجن و پێکدێن لە پێنج کوڕ و کچێک و سەرجەمیان دانیشتووی سنوری داقوقن، زۆربەی حاڵەتەکان بەهۆی لەوەڕاندنی مەڕوماڵاتەکانیانەوە بووەو لەو کاتەدا رەوە بەراز هێڕشی کردووەتە سەریان و برینداری کردوون.
پێداچوونەوە: ئەحمەد مستەفا
