هەموو چاوەکان دەچنە مەدرید
کلاسیکۆی زەبەلاح؛ شەڕێک گەورەتر لە 3 خاڵ
964+
وریا فەتاح
یارییەکانی هەر هەفتەیەکی خولی ئیسپانیا ململانێیە بۆ بردنەوەی سێ خاڵی یارییەکە، بەڵام بۆ کلاسیکۆ یارییەکە تەنیا بردنەوە و لەدەستدانی 3 خاڵ نییە و هەندێ جار بردنەوە تام و چێژی نازناوێکی هەیە.
ئەمڕۆ یەکشەممە، گشت جیهانی تۆپی پێ چاوەڕێی گەورەترین رووبەڕووبوونەوەی جیهانی دەکەن؛ یاریی “ئیل کلاسیکۆ” لە نێوان ریال مەدرید و بارسێلۆنادا.
کاتژمێر 6:15 خولەک بەکاتی هەولێر و 4:15 خولەکی ئێوارە بە کاتی مەدرید، لە هەفتەی 10ـی لالیگا، هەردوو جەمسەرەکەی ئیسپانیا بەیەک دەگەن.
گرنگیی یارییەکە و شەڕی پێشەنگی
بەر لەم رووبەڕووبوونەوە گەرمە، ریزبەندی گشتیی لالیگا ئاڵۆزە و کلاسیکۆ ڕۆڵێکی یەکلاکەرەوە دەبینێت.
ریال مەدرید: ئێستا بە جیاوازیی 2 خاڵ لەپێش ڕکابەرەکەیەوەیە و پلەی یەکەمی گرتووە. بردنەوەی ریال مەدرید پێشەنگییەکەیان بۆ 5 خاڵ زیاد دەکات و مەودایەکی گەورە لە نێوان هەردوو یانەدا دروست دەکات.
بارسێلۆنا: یانە کەتەلۆنییەکە پلەی دووەمی گرتووە. ئەگەر بتوانێت لە بێرنابیۆ 3 خاڵی بەدەست بهێنێت، ئەوا ڕاستەوخۆ پێشەنگیی لالیگا وەردەگێڕێت و یانەی ریال مەدرید دەخاتە پلەی دووەم.
بارودۆخی هەردوو یانە و پێکهاتەکان
هەردوو یانە بە دۆخێکی جیاوازەوە هاتوونەتە نێو ئەم یارییە، بەتایبەتی لە ڕووی پێکانەوە:
ریال مەدریدی خانەخوێ
ریال مەدرید بە سەرکردایەتی ڕاهێنەری نوێی خۆی، چابی ئەلۆنسۆ، لەسەر ئاستی ناوخۆیی ئاستێکی باشی نیشانداوە. یانەکە لە یاریگای خۆی متمانەی بەخۆیەتی و خاوەنی ستافێکی تەواوە لە هێڵی هێرشبردن.
هێزی سەرەکی: سەرنجی زۆر لەسەر هێرشبەری بەهێزی فەرەنسی کیللیان مباپێیە، کە لەم وەرزەدا لە لالیگا گۆڵکاری یانەکەیە، هەروەها ئاستبەرزبوونی ڤینی لەم دواییانە هێزێکی دیکەی یانەکەیە، ئەوە جگە لە بەشداریی دینهاوسن لە هێڵی بەرگری و بێلینگهام و ڤاڵڤێردی و ئاردا گولەر لە هێڵی ناوەند کە هێزی ریال نمایش دەکەن.
بارسێلۆنای میوان
بارسێلۆنا، کە پاڵەوانی وەرزی ڕابردووی لالیگایە، ئەمجارە بە چەند پێکانێکی گرنگەوە ڕووبەڕووی ریال مەدرید دەبێتەوە.
کێشەی سەرەکی: بارسێلۆنا بەهۆی نەبوونی چەند یاریزانێکی سەرەکی، بە تایبەتی لە هێڵی هێرشبردن، تووشی قەیران بووە. ڕاڤینیا، ڕۆبێرت لێڤاندۆڤسکی، و چەند یاریزانێکی دیکە بەهۆی پێکانەوە لە یارییەکە دوور دەکەونەوە.
هیوای یانە: ئاستی بەرز و کاریگەریی گەنجە بەهرەمەندەکان وەک لامین یامال، مارکۆس ڕاشفۆرد و پێدری هیوای کەتەلۆنییەکانن بۆ بەدەستهێنانی بردنەوە.
کلاسیکۆ بە ژمارە
ئەم یارییە ژمارە (262)ـەمی نێوان هەردوو یانەیە لە سەرجەم پاڵەوانێتییەکاندا، و ژمارە مێژووییەکان زۆر لەیەکەوە نزیکن، کە گەورەیی رکابەرییەکە دەردەخەن:
بردنەوەی ریال مەدرید: 105 جار
بردنەوەی بارسێلۆنا: 104 جار
یەکسانبوون: 52 جار
