100 هەزار تۆن
سوەیرە؛ پایتەختى خورماى عێراق
964+
وریا فەتاح
وەزارەتی کشتوکاڵی عێراق رایگەیاند، قەزای سوەیرە لە پارێزگای واست بە بەرهەمهێنانی زیاتر لە 100 هەزار تەن خورما، پێشەنگی پارێزگاکانی عێراقی گرتووە و بووەتە یەکەم.
بەپێی ئامارەکانی وەزارەتەکە، قەزاکە خاوەنی زیاتر لە ملیۆنێک داری خورمای بەردارە کە لەسەر رووبەری 24 هەزار دۆنم چێنراون، ئەم دارستانانە زیاتر لە 52 جۆر خورمای کوالێتی بەرز و تام جیاواز بەرهەم دەهێنن.
لە نێو دەیان جۆری خورمادا، “برحي” بەناوبانگترین و یەکێکە لە باشترین جۆرەکانی خورمای سوەیرە، بەشێوەیەک 35 هەزار داری خورمای لە جۆری برحي لەخۆدەگرێت.
خورماى سوەیرە لە سوسی سوورەوە تا کێشەی نرخ
سەرەڕای ئەم پێشکەوتنە، کەرتی خورما لە سوەیرە رووبەڕووی چەندین ئاستەنگ دەبێتەوە:
ئافاتەکان: سوسی سووری دارخورما بە یەکێک لە مەترسیدارترین ئافاتەکان دادەنرێت کە هەڕەشە لە دارخورماکانی عێراق دەکات، هەروەها جاڵجاڵۆکەی سووریش زیان بە بەرهەم دەگەیەنێت.
کەمیی ئاو: وەک زۆربەی ناوچەکانی تری عێراق، کەمبوونەوەی سەرچاوەکانی ئاو یەکێکە لە کێشە سەرەکییەکانی بەردەم جوتیارانى خورما لە سوەیرە.
کێشەی پاکەتکردن و هەناردەکردن: هەرچەندە بەرهەمێکی زۆر هەیە، بەڵام نەبوونی کارگەی پێشکەوتووی پاکەتکردن و لاوازیی پرۆسەی هەناردەکردن وایکردووە کە نەتوانرێت وەک پێویست سوود لەم بەرهەمە وەربگیرێت.
ئێستا، سوەیرە نموونەیەکی زیندووی توانای خاکی عێراقە بۆ بەرهەمهێنانی باشترین جۆرەکانی خورما، بەڵام بۆ ئەوەی ئەم کەرتە بتوانێت بگەڕێتەوە بۆ سەردەمی زێڕینی خۆی، پێویستی بە چارەسەرکردنی کێشە بنەڕەتییەکانی ئاو، ئافاتەکان و دۆزینەوەی بازاڕی گونجاو هەیە.
