“ئاگاتان لە دایکی ئازیزم بێت کە دوعاکانی ئەو وەک قەڵغان دەیانپاراستم”

964+

ژووری هەواڵ

کە ئەم وشانەتان بیست ئەوە بزانن کە من نەماوم…. ئاگاتان لە فەڵەستین و کچ و کوڕەکەم و دایک و خێزانەکەم بێت
ئەمە دەقی وەسێتنامەکەی ئەنەس شەریفی پەیامنێری کەناڵی جەزیرەیە کە چوار مانگ لەمەوبەر نووسیویەتی و وەسێتی کردووە پاش مردنی بڵاو بکرێتەوە
ئەمە وەسێتنامەو دوا پەیامی منە.
ئەگەر ئەم وشانەتان پێگەیشت، ئەوە بزانن ئیسرائیل سەرکەوتوو بووە لە کوشتن و بێدەنگکردنم.
سەرەتا سڵاوی خواتان لێبێت و رەحمەت و بەرەکەتی ببارێت بەسەرتاندا، خوا ئاگادارە هەرچی هێزو توانام هەبوو خستبوومە گەڕ بۆ ئەوەی پاڵپشت و دەنگی رۆڵەکانی گەلەکەم بم، هەر لەو کاتەوەی چاوم بە ژیان هەڵهێنا لە کۆڵان و گەڕەکەکانی ئۆردوگای جەبالیا بۆ پەنابەران. هیوام ئەوە بووە خودا تەمەنم درێژ بکاتەوە تا لەگەڵ خانەوادە و خۆشەویستانم بگەڕێمەوە بۆ زێدی رەسەنی خۆمان، عەسقەلانی داگیرکراو “مەجدەل”، بەڵام ویست و فەرمانی خودا لە پێش هەر شتێکی دیکەوەیە.
ئازارم بە هەموو وردەکارییەکانیەوە چەشتووە، چەندین جار سوێی ئێش و تاڵاوی لە دەستدانم چەشتووە،سەرەڕای ئەوەش رۆژێک لە رۆژان لە گەیاندنی راستی وەک خۆی، بەبێ ساختەکاری و شێواندن، سڵم نەکردەوە. بەڵکو خودا شایەد بێت لەسەر ئەوانەی بێدەنگ بوون و بە کوشتنمان رازی بوون، ئەوانەی هەناسەکانیان لێ بڕیوین و تەرمی ئەو هەموو منداڵ و ژنە تەزوویەکی پیادا نەهێنان و ئەو کۆمەڵکوژییەیان رانەگرت کە زیاتر لە ساڵ و نیوێکە گەلەکەمان رووبەڕووی دەبێتەوە.
وەسێتتان بۆ دەکەم ئاگاتان لە فەلەستین بێت، گەوهەری تاجی موسڵمانان و لێدانی دڵی هەموو ئازادیخوازێکی ئەم جیهانە.
وەسێتتان بۆ دەکەم ئاگاتان لە خەڵکەکەی بێت، لە منداڵە ستەملێکراوەکان، کە تەمەن مەودای نەدان خەون ببینن و بە ئارامی و ئاشتی بژین. جەستەی پاکیان بە هەزاران تۆن بۆمب و مووشەکی ئیسرائیلی وردوخاش کرا، پارچەکانی جەستەیان بەسەر دیوارەکاندا پەرش و بڵاو بووەوە.
وەسێتتان بۆ دەکەم کۆت و بەندەکان بێدەنگتان نەکەن، سنورەکان نەتانبەستنەوە، ببنە پردێک بەرەو ئازادکردنی نیشتمان و خەڵکەکەی، تاکو خۆری کەرامەت و ئازادی لەسەر خاکە زەوتکراوەکەمان هەڵدێت.
وەسێتتان بۆ دەکەم ئاگاتان لە کەسوکارەکەم بێت،
ئاگاتان لەبینایی چاوم بێت (شام) کچە شیرینەکەم ، کە رۆژگار کۆمەکی نەکردم بیبینم گەورەبێت بەو شێوەیەی خەونی پێوە دەبینم .
ئاگاتان لە کوڕە ئازیزەکەم (سەڵاح) بێت، کە هیوادار بووم ببمە یارمەتیدەر و هاورێگای تا پشت ئەستوور بێت و باری شانم سووک بکات و پەیامەکە تەواو بکات.
ئاگاتان لە دایکی ئازیزم بێت کە بە بەرەکەتی دوعاکانی ئەو گەیشتمە ئەوەی پێی گەیشتم، دوعاکانی قەڵا و نووری رێگەم بوون. لە خودا دەپاڕێمەوە ئارامی بە دڵی ببەخشێت و لە جیاتی من باشترین پاداشتی بداتەوە.
ئاگاتان لە دایکی ئازیزم بێت کە دوعاکانی ئەو وەک قەڵغان دەیانپاراستم، ئاگاتان لە هاوڕێی ژیانم بێت، هاوسەرە خۆشەویستەکەم (بەیان) کە جەنگ بۆ رۆژ و مانگی درێژ لەیەکی کردین، بەڵام لەسەر پەیمانی خۆی مایەوەو وەک رەگی دار زەیتوون نەلەرزی.
کە جەنگ بۆ ماوەی چەندین رۆژ و مانگی درێژ لێکی دابڕین، بەڵام لەسەر پەیمان مایەوە، وەک قەدی دار زەیتوونێک چەستە و نەچەمایەوەو ئارامگر و خۆڕاگر بوو، لە غیابی مندا ئەمانەتەکەی بە هەموو هێز و باوەڕێکەوە هەڵگرت.
وەسێتتان بۆ دەکەم لە دەوریان کۆببنەوەو لە دوای خودای مەزنم ببنە پشت و پەنایان.
ئەگەر مردم، ئەوا بە سەربەرزی و جێگیری لەسەر بیرباوەڕەکەم دەمرم، خودا بە شایەد دەگرم کە من رازیم بە قەزا و قەدەری، باوەڕم بە دیداری هەیەو دڵنیام کە ئەوەی لای خودایە باشتر و بەردەوامترە.
خودایە، لە ریزی شەهیداندا وەرمبگرەو لە گوناهی پێشوو و داهاتووم خۆش بە و خوێنەکەم بکە بە نوورێک کە رێگای ئازادی بۆ گەل و خێزانەکەم رووناک بکاتەوە.
بمبوورن ئەگەر کەمتەرخەمیم کردبێت، دوعای رەحمەتم بۆ بکەن، چونکە من لەسەر پەیمان رۆیشتم و نەگۆڕام.
غەززەتان لەبیر نەچێت..
لە دوعای خێرو داوای لێخۆشبوون بێبەشم مەکەن.
ئەنەس جەمال شەریف