دیمەنێك لە كۆبوونەوەكانی نێوان هەرێم و بەغدا
ئەمڕۆ یەکلاکەرەوەیە
رێککەوتنی هەولێر و بەغدا لەسەر مێزى ئەنجومەنى وەزیرانە
964+
وریا فەتاح
بەغدا و هەولێر لە رێککەوتنێکی نوێ بۆ کۆتاییهێنان بە قەیرانی موچەی فەرمانبەرانی هەرێمی کوردستان نزیکبوونەتەوە و چاوەڕوان دەکرێت ئەمڕۆ سێشەممە، دۆسیەکە لە کۆبوونەوەی ئەنجومەنی وەزیرانی عێراقدا بخرێتەڕوو.
سەباح سوبحی، ئەندامی لیژنەی نەوت و گاز لە پەرلەمانی عێراق، بە ڕۆژنامەى “الصباح”ـی نیمچەفەرى عێراقى راگەیاندووە، رێککەوتنێکی سەرەتایی کراوە و چاوەڕێ دەکرێت لە چەند کاتژمێری داهاتوودا رابگەیەندرێت و واژۆ بکرێت.
وەک ئەوەى رۆژنامەکە باسى کردووە، وردەکارى رێککەوتنەکە بەمشێوەیەیە:
یەکەم: حکومەتی هەرێم رۆژانە 300 هەزار بەرمیل نەوت رادەستی کۆمپانیای بەبازاڕکردنی نەوتی نیشتمانیی (سۆمۆ) دەکات.
دووەم: بەرامبەر بەوە، هەرێمی کوردستان رۆژانە 46 هەزار بەرمیل نەوتی بۆ بەکاربردنی ناوخۆیی و پاڵاوتن پێدەدرێت.
ئەم پێشهاتانە دوای جوڵەیەکی سیاسیی چڕ دێت لە ماوەی 48 کاتژمێری رابردوودا، کە دوێنێ دووشەممە، محەمەد شیاع سودانی سەرۆک وەزیران و عەبدولـلەتیف رەشید سەرۆک کۆمار کۆبوونەوە و جەختیان لەسەر چارەسەرکردنی کێشەکان بەپێی دەستوور و بەرژەوەندیی نیشتمانی کردەوە.
هەروەها دوو رۆژ پێشتر، مەحمود مەشهەدانی، سەرۆکی پەرلەمانی عێراق، سەردانی هەولێری کرد و لەگەڵ بەرپرسانی هەرێمدا تاوتوێی دۆسیەی موچە و هەناردەکردنی نەوتی کردبوو.
