تا 30 ساڵ ژیان لەو شوێنە ئاسایی نابێتەوە
چی دەبێت ئەگەر ئێران بە بۆمبی ئەتۆمی هێرش بکاتە سەر ئیسرائیل؟
964+
ژووری هەواڵ
چی دەبێت ئەگەر ئێران بە بۆمبی ئەتۆمی هێرش بکاتە سەر ئیسرائیل؟ رەنگە خەڵکێکی زۆر هەبێت دڵیان بەمە خۆش بێت، بەڵام ئەوەی نایزانن ئەوەیە دوای هێرشەکە چ کارەساتێک روودەدات.
لەگەڵ تەقینەوەی یەکەم، شوێنی تەقینەوەکە بە تیرەی یەک کیلۆمەترو نیو دەبێتە خۆڵەمێش، هەموو شتێک لەناو دەچێت، مرۆڤ، باڵەخانە، ئۆتۆمبێل، تەنانەت پۆڵاو ئاسنیش دەتوێنەوە، دوای ئەمە قۆناغی تەقینەوەی هەوایی و دەنگی دێت، شەپۆلێک کە هەموو ئەو دەورووبەرە وێران دەکات، پەنجەرە دەشکێنێت و دیوار دەڕووخێنێت و داروبەرد لەگەڵ خۆیدا رادەماڵێت، لە تیرەیەکدا کە دەگاتە شەش کیلۆمەتر هیچ شتێک و هیچ کەسێک بە سەلامەت دەرناچێت.
ئەمە هەموو شتێک نییە، وێرانکاری لە سنوور دەپەڕێتەوە، خەڵکی غەزەو ناوچەکانی تری فەڵەستین لەناو دەبات، لەوەش بترازێت تیشەکەکە دەگاتە میسرو سوریا و لوبنان و ئەردەن، رەنگە خەڵکی ئەم وڵاتانە دەمودەست نەمرن، بەڵام دوای چەند ساڵێک نەخۆشییە کوشندەکان بەشێکی زۆری خەڵکەکە لەناو دەبەن و بۆ چەند نەوەیەکی داهاتوو منداڵی زیان بەرکەوتوو لەدایک دەبن.
دوای ئەمانە هەورێکی خۆڵەمێشی ئەتۆم دەچێتە ئاسمان کە گەردیلەی مردنی لەگەڵ خۆی هەڵگرتووە، (با) لەگەڵ خۆی دەیگەیەنێتە ئاسمانی سعودییەو عێراق و دەشگاتەوە خودی ئێران، بارانێکی رەشی تێربوو بە ئەتۆم دادەبارێت، شوێنی تەقینەوەکە دەبێتە بیابان و هەتا 30 ساڵی داهاتوو ژیان تیایدا سەرهەڵناداتەوە.
بێگومان ئەمە دەبێتە جەنگێکی ئەتۆمی گشتگیرو ئیسرائیلیش بێدەنگ نابێت، هەر بۆمی ئەتۆمەو وەڵامی بۆمبی ئەتۆم دەداتەوەو شار لە دوای شار وێران دەکرێن و جیهان پێی دەخزێتە شەڕێکەوە کە سەرەتای دیارە بەڵام کۆتاییەکەی نا. بۆیە لەبەر ئەم هۆکارانە ئەگەری بەکارهێنانی چەکی ئەتۆم لە نێوان ئێران و ئیسرائیلدا ئەگەرێکی دوورەو چاوەڕێ ناکرێت لە هیچ بارێکدا رووبدات.