هەواڵەکانی وەرزش
لویس ساكۆ، پاتریارك و سەرۆكی كەنیسەی كلدانی لە عێراق و جیهان
لویس ساكۆ: سوپاس بۆ هەرێمی كوردستان
رۆژی نزای نیشتمانی لە هەولێر بەڕێوەدەچێت
964+
ئەرسەلان عەبدوڵا
بۆ یەكەمجار رێوڕەسمی رۆژی نزای نیشتمانی لە هەولێر بە بەشداریی ژمارەیەكی زۆری سەركردە سیاسییەکان و پیاوانی ئایینی بەڕێوەدەچێت، بڕیارە سێ رۆژیش بەردەوام بێت.
لە رێوڕەسمەكەدا كە بەیانی ئەمڕۆ چوارشەممە 23.4.2025 لە هەولێر دەستیپێكرد، لە ژێر ناونیشانی “بەرەو یەکبوون لە باوەڕدا” بەڕێوەدەچێت و تێیدا نزا بۆ هەرێمی كوردستان دەكرێت و هەموو ئایین و ئایینزانەكان تێیدا بەشدارن و زیاتر لە 400 كەسایەتی سیاسی و ئایینی كوردستان و وڵاتانی دەرەوە تێیدا ئامادەن.
رۆژی نزای نیشتمانی، وەك رێزگرتن و یادکردنەوەی پێکەوەژیانی ئاشتییانەی نێوان پێکهاتە و ئایینە جیاوازەکانی هەرێمی کوردستانە، بەڵام لە وڵاتانی دیكەش ئەنجام دەدرێت و ئەوەی لە هەولێریش دەستیپێكردووە، سێ رۆژ دەخایەنێت، تێیدا جگە لە نزاكردن، پانێل و وتاریش پێشكەش دەكرێن، دواتر سەردانی شوێنە ئایینییەكانی كوردستانیش دەكرێت.
لە رێوڕەسمی دەستپێكدا كاردیناڵ لویس ساكۆ، پاتریارك و سەرۆكی كەنیسەی كلدانی لە عێراق و جیهان لە وتەیەكدا وتی، سوپاس بۆ هەرێمی كوردستان بۆ دەستەبەركردنی دیموكراسی و بەهاكانی مافی مرۆڤ، سوپاس كە هەزاران ئاوارەی مەسیحی لەخۆگرتووە.
رێوڕەسمەكە لە ژێر لۆگۆی داربەڕووییەک بەڕێوەدەچێت، کە رەنگەکانی ئاڵای کوردستانی لەسەر نەخشێنراوە.
وەك لە رێوڕەسمی بۆنەكە ئاماژەی پێكراوە، ئامانجی رۆژی نزای نیشتمانی، یەکڕیزی و رێزگرتنی باوەڕدارانی ئایینە جیاوازەکان و ئازادی ئاینییە، هەروەها پێکەوەژیان و کۆکردنەوەی سەرکردە و کەسایەتیی ئایینی و دەنگە رۆحانییەکانە.
