ژنەکەی جێی هێشتووە
بێ لانەیی باوکێک و دوو منداڵی ناچار کردووە لەناو دەواجین بژین
964+
عەبدولعەزیز خالند – هەولێر
باوکێک و دوو منداڵ، نەبوونی لانەیەک بۆ ژیان کردن ناچاری کردوون چەند ژوورێکی سارد و سڕی بلۆک و خۆڵ و بێ خزمەتگوزاری بکەن بە ماڵی خۆیان.
ماوەی سێ هیوا سەدیق و دوو منداڵەکەی، لەناو دەواجینێک ژیان بەسەر دەبەن، یەکێک لە منداڵەکانی نەخۆشی ئۆتیزمی هەیە منداڵەکەیتریش دەیەوێت یارمەتی باوکی بدات وازی لە قوتابخانە هێناوە.
هیوا سەدیق، قسەی بۆ 964 کرد، وتی، ماوەی سێ ساڵ زیاترە لە گەرەکی ئاراس لە نێو دەواجین لەگەڵ منداڵەکانم ژیان بەسەر دەبەم، تەنها ئیشی کرێکاری دەکەم ئەگەر منداڵەکانم کێشەیان نەبێت و بتوانم جێیان بهێڵم، ئەوەش نەکەم نان نییە بیخۆین.
چەند ساڵێکە و دوای سووتانی خانووەکەیان لە خێزانەکەی جیابووەتەوە، ئەو دەڵێ، قبوڵی فەقیری منی نەکردووە.
هیوا وتی، پێنج ساڵە خۆم منداڵەکانم بەخێو دەکەم و هەر خۆم جلیان بۆ دەشۆم و خواردنیان بۆ ئامادە دەکەم بووم بە دایک و باوکیان، دەشڵێ، لەبەر خراپی شوێنەکەیان تووشی چەندەها نەخۆشی بوون و ژیانیان یەکجار سەختە.
964 ئەوەی زانیوە هیوا دووجار ماڵی سووتاوە، جاری یەکەم لە ناو خانوییەکی کرێ، جارێکیتریش لە ناو دەواجنەکە، ئەوەش هۆکارە بۆ ئەوەی نەتوانێ خانوویەکی نوێ بە کری بگرێ بەهۆی نەبوونی پارە و تەنانەت وتی، ناتوانێ ژیانی هاوژینی دروست بکاتەوە تا کەسێک هەبێ ئاگای لە منداڵەکانی بێت.
پێداچوونەوە: ئەحمەد مستەفا
