ئاگر لە هۆتێلێکی تورکیا زیاتر لە 10 کەسی کوشت

ژووری هەواڵ

لە ئەنجامی کەوتنەوەی ئاگر لە هۆتێلێکی ناوچەی گەشتیاریی کارتاڵکایا تایبەت بە یارییەکانی خلیسکێنەی سەربەفر، 10 کەس گیانیان لەدەستدا و 32 کەسی دیکەش برینداربوون.

ئاگرەکە دەوروبەری کاتژمێر 03:30ی بەرەبەیان لە چێشتخانەی یەکێک لە هۆتێلەکانی ناوچە گەشتیارییەکە کەوتووەتەوە و بە ماوەیەکی کەم تەواوی هۆتێلەکەی گرتووتەوە.

بە گوێرەی زانیاریی میدیاکانی تورکیا، لە ئەنجامی ئاگرەکەدا 10 کەس گیانیان لەدەستداوە و 32 کەسی دیکەش برینداربوون و سەرجەم ئەو میوانانەی لە هۆتێلەکەدا بوون کە نزیکەی 234 کەس بوون، دەربازکراون.
لە ئێستادا هەوڵەکانی کوژاندنەوەی ئاگرەکە بەردەوامە.

بۆڵو دەکەوێتە باکووری خۆرئاوای تورکیا و 260 کیلۆمەتر لە ئیستانبوڵەوە دوورە. ئەو ناوچەیەشی هۆتێلەکە تیایدا گڕی گرتووە، یەکێکە لە ناوەندە گەشتییارە ناسراوەکانی تورکیا.