دوو کەس گیانیان لەدەستدا و 18ـی دیکەش بریندارن
یەکەم رووداوی کەوتنەخوارەوەی فڕۆکە لە ساڵی تازەدا لە ئەمریکا روویدا
964+
شۆڕش قادری
یەکەم رووداوی کەوتنەخوارەوە فڕۆکە لە ساڵی تازەدا لە ئەمریکا روویدا و بەهۆیەوە دوو کەس گیانیان لەدەستدا و 18ـی دیکەش برینداربوون.
ئاژانسەکانی هەواڵ بڵاویانکردەوە، لە شاری فولێرتۆن لە ویلایەتی کالیفۆڕنیای ئەمریکا فڕۆکەیەکی بچووک کەوتووەتە خوار و خۆی بە کۆگایەکی کۆمپانیایەکی دروستکردنی قەنەفەدا کێشاوە، لە ئەنجامی رووداوەکە لانیکەم دوو کەس گیانیان لەدەستداوە و 18ـی دیکەش برینداربوون.
دوای رووداوەکەش زیاتر لە 100 کارمەندی کۆمپانیاکە کۆگاکەیان چۆڵ کردووە و لە شوێنەکە دوور خراونەتەوە.
ساڵی 2024 چەندین رووداوی فڕۆکەی جیاواز لە جیهاندا روویاندا، دوایین رووداویش لە 29.12.2024 روویدا کە فڕۆکەیەکی جۆری بۆئینگ 737ـی هێڵی ئاسمانی جێجوـی کۆریای باشوور بە 181 سەرنشینەوە و لەکاتی گەڕانەوەی لە بانکۆکی تایلەند و ساتی نیشتنەوەی لە فڕۆکەخانەی نێودەوڵەتی موان لە باشووری رۆژئاوای کۆریای باشوور تێکشکا، تەنیا دوو کەس لە رووداوەکە رزگاریان بوو و ئەوانی دیکە گیانیان لەدەستدا.
لە رووداوی تێکشکانی فڕۆکەکەی کۆریای باشوور تەنیا دوو کەس رزگاریان بووە