نۆ کەس نەخۆشخانەیەکى تاران کوێر بوون

964+

وریا فەتاح

بەپێى هەواڵێکى میدیاکان، نۆ کەس لە نەخۆشخانەیەکى چاو لە تاران، بیناییان لەدەست داوە، بەڵام تەندروستى ئێران دەڵێت، ئەو رووداوە چەند مانگ لەمەوبەر روویداوە و ئێستا میدیاکان گەرمى دەکەنەوە.

دواى ئەوەى هەواڵى کوێربوونى ئەو نۆ کەسە بڵاوکرایەوە، حسێن کرمانپوور، بەرپرسى پەیوەندییە گشتییەکان و راگەیاندنى وەزارەتى تەندروستى ئێران رایگەیاند، رووداوەکە کۆنە و هى چەند مانگ بەمەوبەرە.

ئەو بەرپرسەى وەزارەتى تەندروستى ئێران، بڵاوبوونەوەى ئەو هەواڵانەى بە لێدان لە کەرتى تەندروستى ئێران وەسف کرد و وەک خۆى دەڵێت، لێدانە لە کەرتى پێشکەوتووى تەندروستى ئێران.

رەخنەى توندیش لە میدیاکان دەگرێت کە بەم هەواڵانە خەڵک نیگەران دەکەن، لە کاتێکدا بەدواداچوون و لێکۆڵینەوەکان دەستیان پێکردووە.

“راستە ئەوەى روویدا و کارێکی زۆر خراپ بوو، بەڵام وەک ئەوە نییە هەمووان رۆژانە هەواڵى ساختە بڵاوبکەنەوە”، بەرپرسى پەیوەندییە گشتییەکان و راگەیاندنى وەزارەتى تەندروستى ئێران واى وت.

باسى لەوەشکردووە، ئەو شتانە دەکرێت رووبدەن و پێشتریش روویانداوە، بەڵام نازانن بۆچى ئەمجارە میدیاى بیانى رووماڵى کردووە.

ئەوەش لە کاتێکدایە، ماوەى چەند رۆژێکە بەشێم لە میدیاکانى ئێران و دەرەوە باس لەوە دەکەن نۆ کەس لە نەخۆشخانەیەکى چاو بەهۆى پێدلنى دەرمانى هەڵە، بیناییان لەدەست داوە.